کابل ټکی کام (چهارشنبه، ۲۷وری، ۱۴۰۴ل)
د افغانستان د اسلامي امارت وياند مولوي ذبيح اللّٰه مجاهد په کابل کې د همغږۍ د ګډې کمیټې یا JCC په نامه د افغانستان او پاکستان ترمنځ د مشترکې غونډې د جوړيدو خبر ورکړ.
ښاغلي مجاهد ويلي، چې نن به کابل د يادې غونډې کوربه وي او زياتوي چې د پاکستاني پلاوي مشري به د هغه هېواد ځانګړی استازی ښاغلی محمدصاق خان او د افغانستان لوري مشري د دفاع وزارت مرستیال ښاغلی ملا عبدالقیوم ذاکر کوي.
د ښاغلي مجاهد په خبره، د جی سي سي په نوم دا اوومه غونډه ده چې د دواړو هېوادونو ترمنځ یوځل په اسلام آباد او یوځل په کابل کې ترسره کیږي.
نوموړي ويلي، چې په دې غونډه کې به د ډیورند کرښې په اوږدو کې د احتمالي منازعاتو د هواري او د دواړو لوریو ولسونو ته د تسهیلاتو په رامنځته کیدو خبرې کیږي.
