کابل ټکی کام (پنجشنبه، ۲۸وری، ۱۴۰۴ل)
د راپورونو له مخې، د روسیې ستره محکمه د «طالبانو نوم د روسیې له ممنوعه ډلو د نوملړ څخه د لیرې کولو» موضوع څېړي.
ځینو هندي رسنیو راپور ورکړی چې د روسیې عالي محکمه نن (پنجشنبه، د وري ۲۸مه) د دې هېواد د یوه څارنوال په غوښتنه یوه ناسته کوي، څو د «طالبانو نوم د روسیې له ممنوعه ډلو د نوملړ څخه د لیرې کولو» موضوع وڅېړي.
تر دې وړاندې، د تېر میلادي کال د مئ میاشتې په جریان کې، د روسیې د بهرنیو چارو او عدلیې وزارتونو ولسمشر پوتین ته یو راپور وړاندې کړی و، چې په کې یې د اسلامي امارت نوم د ممنوعه ډلو له نوملړ څخه د لیرې کولو په تړاو یو لړ وړاندیزونه شامل وو.
