کابل ټکی کام (پنجشنبه، ۲۸وری، ۱۴۰۴ل)
د روسیې سترې محکمې نن پنجشنبه د افغانستان اسلامي امارت نوم د بنديزونو له نوملړ څخه ليرې کړ چې په دې اړه نن په کابل کې د روسیې فدراسیون سفیر دیمیتري ژیرنوف د ا.ا.ا د بهرنیو چارو له وزیر مولوي امیر خان متقي سره کتلي دي.
د بهرنیو چارو وزارت په خبرپاڼه کې راغلي چې د روسيې سفیر د ا.ا.ا. د بهرنیو چارو وزیر ته د روسیې د سترې محکمې هغه تصمیم رسما ابلاغ کړ چې له مخې یې د افغانستان اسلامي امارت چې پخوا د «طالبانو غورځنګ» په نوم یادېده، د ممنوعه ډلو له لست څخه وویستل شو.
د روسيې سفير ويلي، چې د اسلامي امارت نوم د بنديزونو له نوملړه ايستل د روسیې او افغانستان تر منځ په اقتصادي او سیاسی برخه کې د اړیکو د پرمختګ لپاره یوه تاریخي پرېکړه ده.
په خبرپاڼه کې زياته شوې، چې د افغانستان د بهرنیو چارو وزیر د روسیې فدراسیون د حکومت د دې ګام ستاینه او مننه کړې او یاد اقدام یې د افغانستان او روسیې تر منځ د اړیکو په برخه کې د پام وړ پرمختګ بللې چې په وينا يې له یادې پرېکړې سره د دواړو هیوادونو تر منځ د لا زیاتو سیاسي او اقتصادي همکاریو مخ ته یواځینی پاتې خنډ هم له منځه ولاړ.
د شنونکو په باور، دا اقدام طالبانو ته یو ډیپلوماټیک بری بلل کېږي، ځکه چې دوی په ۲۰۰۳ کال کې د روسیې له خوا د ترهګرو په لیست کې شامل شوي وو، او له هغوی سره هر ډول تماس د روسیې د قوانینو له مخې جرم بلل کېده.
د افغانستان لپاره د روسيې ځانګړي استازي ضمير کابلوف مسکو ټایمز رسنۍ ته ويلي، چې تر دې پرېکړې وروسته به د اسلامي امارت استازي د بريکس سازمان راتلونکې غونډې ته هم وبلل شي، چې ټاکل شوې د روانې مياشتې په پای کې ترسره شي.
