کابل ټکی کام (يکشنبه، ۷ غویی، ۱۴۰۴ل)
د افغانستان اسلامي امارت د یوې اعلامیې په خپرولو سره د ثور د ۷مې او ۸مې تاريخي پېښو په اړه په خپره کړې اعلامیه کې دغه ورځې د هېواد د ازادۍ او قربانۍ له مهمو ورځو څخه بللي دي.
د اسلامي امارت په اعلامیه کې راغلي، چې نن د (ثور ۷مه) له هغې نظامي کودتا څخه ۴۷ کلونه تېرېږي، چې د ۱۳۵۷ لمريز کال په همدې ورځ د کمونېستي لښکرو لخوا د وخت د حکومت پر وړاندې ترسره شوه.
اسلامي امارت په اعلامیه کې دغه کودتا غندلې او ويلي یې دي، چې د افغانستان پر خاوره د کمونېستي یرغل لپاره زمینه برابره شوې وه، خو د هېواد مجاهدو مسلمانانو په تش لاس د شوروي استعمار خوب رښتيا کېدو ته پرينښود.
اعلامیه زياتوي، افغانانو له همدې ورځې خپله مبارزه پیل کړه، چې تر څوارلسو کلونو پورې يې دوام وکړ او بالاخره د ۱۳۷۱ لمريز کال د ثور په ۸مه یې ازادي او خپلواکي ترلاسه کړه.
اسلامي امارت د ثور ۸مه د افغانستان د ازادۍ، افتخار او الهي نعمت ورځ بللې او ويلي يې دي چې باید د دې نعمت شکر ادا شي.
په اعلامیه کې همداراز ویل شوي، که څه هم د ثور د ۸مې وروسته افغانانو د ارام او شرعي نظام تمه لرله، خو د څو قدرتطلبو ډلو ترمنځ خپلمنځي جګړو دغه هیلې له منځه يووړې.
اسلامي امارت ويلي، اوس چې د شرعي نظام د استقرار، وحدت او ثبات لپاره زمینه برابره شوې، ټول افغانان باید د اسلامي نظام د ساتنې او د یوه با ثباته افغانستان د دوام لپاره یو موټی او متعهد پاتې شي.
