کابل ټکی کام (سه شنبه، ۱۶ غویی، ۱۴۰۴ل)
د افغانستان د کانونو او پټرولیم وزارت وايي، یو شمېر روسي پانګوالو د هېواد د کانونو په ځانګړي ډول د طلا او زمردو په برخو کې د پانګونې لپاره لیوالتیا څرګنده کړې ده.
د دغه وزارت د معلوماتو له مخې، دغې پانګوالو د ياد وزارت د پاليسۍ له معین سره په لیدنه کې ویلي چې غواړي د افغانستان د طلاو د پاکولو (زرشويي) او زمردو د استخراج په برخو کې پانګونه وکړي.
د کانونو وزارت ویاند همایون افغان، وایي: «په دې لیدنه کې د روسي شرکتونو رئیسانو د خپلو تجربو، وړتیاوو او کارونو په اړه معلومات ورکړي، او غوښتنه یې کړې چې د افغانستان په معادنو، په ځانګړي ډول د طلا او قیمتي ډبرو په برخه کې پانګونه وکړي.»
بلخوا د افغانستان د صنایعو او کانونو خونې مرستیال سخياحمد پیمان وایي، که روسیه چې روسيه پر کانونو پانګونه وکړي، نو باید د معادنو پروسس هم د هېواد دننه ترسره شي.
د لومړنیو ارزونو له مخې، افغانستان شاوخوا درې تریلیونه ډالره ارزښت لرونکي طبیعي زیرمې لري.
