کابل ټکی کام (پنجشنبه، ۲۵غویی، ۱۴۰۴ل)
د افغانستان د ریاستالوزراء اقتصادي مرستیال ملا عبدالغني برادر اخوند د ثور په ۲۵مه د کازان ۱۶م نړیوال اقتصادي فورم په څنډه کې د تاتارستان له ولسمشر رستم مینیخانوف سره ولیدل.
د اقتصادي معاونيت په خبرپاڼه کې راغلي چې دواړو لورو د لیدنې پر مهال پر دوه اړخیزو اقتصادي، سوداګریزو اړیکو او د تاتارستاني پانګوالو د پانګونې پر فرصتونو خبرې کړي دي زياتوي:«ملا برادر اخوند د یاد فورم لپاره د اسلامي امارت د پلاوي بلنه ستایلې او دغه اقدام یې د افغانستان او نورو هېوادونو ترمنځ د اړیکو د پیاوړتیا لپاره مهم بللی.»
هغه وویل، د اسلامي امارت بهرنی سیاست متوازن، اقتصادمحوره او د همکارۍ پر بنسټ ولاړ دی.
نوموړي د افغانستان شرایط د پانګونې لپاره مناسب وبلل او د انرژۍ، زېربناوو، نفت او ګاز، رېل پټلۍ او ساختماني برخو کې یې د پانګونې بلنه ورکړه او ډاډ يې ورکړ، چې اسلامي امارت به بهرنیو پانګوالو ته هر ډول اسانتیاوې برابرې کړي.
د تاتارستان ولسمشر د افغانستان سره د اقتصادي همکاریو د پراخولو ژمنه وکړه او ویې ویل، چې سوداګریز پلاوي به کابل ته ولېږي.
د کاماز شرکت مشر د موټرو صادراتو د زیاتوالي او د خوراکي توکو وزیر د صادراتو پراخېدو لپاره چمتووالی وښود. ملا برادر اخوند مینیخانوف ته د افغانستان د سفر بلنه هم ورکړه.
