کابل ټکی کام (یکشنبه، ۴ غبرګولی، ۱۴۰۴ل) د حماس اسلامي غورځنګ پوځي څانګې القسام لېوا اعلان کړی، چې د غزې تړانګې په جنوبي خان یونس سیمه کې یې د اسرائيلي ځواکونو پر ضد پیچلي او همغږي عملیات ترسره کړي دي.
د القسام په وینا یاد عملیات د خان یونس ښار په ختیځه برخه، القرارة سیمه کې ترسره شول، چیرته چې یې ځواکونو یو کور د قوي چاودېدونکو موادو په وسیله والوځاوه. د القسام د معلوماتو له مخې، دا کور د اسرائیلي عسکرو له لوري د پوځي مرکز په توګه کارول کېده، او د چاودنې له امله اشغالګرو ته درنه مرګژوبله اوښتې ده.
سرچینې زیاتوي، چې د یادې چاودنې وروسته، کله چې نور اسرائيلي سرتېري سیمې ته ورننوتل، القسام ځواکونو د یوه تونل په خوله (عين نفق) کې بلې چاودنې ته چمتو چاودېدونکي مواد وچوول، چې له امله یې نور عسکر هم له تلفاتو سره مخ شول.
ورپسې، د دواړو لورو ترمنځ د سپکو او درنو وسلو جګړه رامنځته شوه. القسام راپور ورکړی چې د برید پر مهال یې د اسرائيلي هیلیکوپټرو ښکته کېدل مشاهده کړي، چې ویل کېږي د ټپي او وژل شوو سرتېرو د انتقال لپاره را بلل شوي وو.
د یادونې وړ ده چې القسام دا ډول عملیات د اشغالګرو پر ضد د “دفاعي مقاومت” یوه برخه بولي او ټینګار کوي چې د هر ډول یرغل په وړاندې به خپلې مبارزې ته دوام ورکوي.
