کابل ټکی کام (دوشنبه، ۵غبرګولی، ۱۴۰۴ل)
د سعودي عربستان حکومت اعلان کړی چې د ۲۰۲۶ کال له پیل څخه به په هېواد کې په ۶۰۰ ټاکل شویو سیاحتي ځایونو او هوټلونو کې د الکولي مشروباتو پر خرڅلاو او استعمال باندې لګېدلی بندیز لرې کړي.
د عربي رسنۍ “العربیه” د راپور له مخې، دغه اقدام به په ځانګړي ډول په ریاض، جده، او د نیوم او قدية په څېر لویو سیاحتي سيمو کې پلي شي.
د سعودي چارواکو په وینا، د الکولي مشروباتو اجازه به یوازې د بېر، واین او سایډر (Cider) په څېر مشروباتو پورې محدوده وي، او قوي الکولي مشروبات (Spirits) به لا هم منع وي.
د “الشرق الأوسط” ورځپاڼې د راپور پر بنسټ، دا پرېکړه د ولیعهد محمد بن سلمان د اصلاحاتو د تګلارې یوه برخه ده، چې غواړي سعودي عربستان د نړیوالو معیارونو سره سمون ولري او د بهرنیو پانګوالو او سیاحانو لپاره یو جذاب ځای وګرځي.
سعودي عربستان له ۱۹۵۲ کال راهسې د اسلامي شریعت پر بنسټ د الکولي مشروباتو پر خرڅلاو او استعمال سخت بندیز لګولی و.
په تېرو کلونو کې، د ویژن ۲۰۳۰ تر چتر لاندې، یو شمېر ټولنیز محدودیتونه لکه د ښځو پر موټر چلولو او سینمایي فعالیتونو بندیزونه لرې شوي، او اوس د الکولي مشروباتو د بندیز لرې کول د دې اصلاحاتو یوه نوې برخه ګڼل کېږي.
د ټولنيزو رسنيو يو شمېر فعالانو دغه اقدام د اسلامي ارزښتونو پر خلاف بللی او ویلي یې دي چې دا پرېکړه د سعودي د دیني هویت لپاره زیانمنه ده.
