کابل ټکی کام (د ۱۴۰۴ کال د غبرګولي ۱۲مه)
د اسلامي امارت د ټولګټو وزارت اعلان کړی چې د سالنګونو لویه لار به له لوی اختر وروسته د هر ډول ټېلري وسایطو پر مخ موقتي وتړل شي، ترڅو د لارې د پاتې برخو اساسي بیارغونې چارې په مؤثر ډول ترسره شي.
د وزارت د معلوماتو له مخې، یاده پرېکړه به د ۱۴۴۶ هـ.ق کال د ذوالحجې له ۱۳مې نېټې، چې د ۱۴۰۴ هـ.ش کال د جوزا له ۲۰مې سره برابره ده، عملي شي او تر هغو به دوام وکړي چې د روان کال د کاري پلان ټولې چارې بشپړې شي.
د کار د تنظیم او موټرچلوونکو د ستونزو د کمولو لپاره، وزارت وايي چې د اصلي مسیر په یوه خط کې د رغنیزو چارو دوام ته اجازه ورکول شوې، او له بل خطه به د لنډو بار وړونکو وسایطو (کوچنیو موټرونو) تګ راتګ د نوبت له مخې یو شپه له شماله جنوب ته او بله شپه له جنوبه شمال ته تنظیم شي.
همداراز، د مسافرو وړونکي وسایط لکه ۳۰۳، ۴۰۴ او ۵۸۰ ته به اجازه ورکړل شي چې د چمتو شوي بدیل یا فرعي مسیر له لارې د ورځې ۲۴ ساعته له دواړو لوریو تګ راتګ وکړي.
ټولګټو وزارت وايي، هڅه کوي چې د سالنګونو دا مهمه لویه لار په لوړ کیفیت سره ورغوي.
