کابل ټکی کام (چهارشنبه، ۸ زمری، ۱۴۰۴ل):
د نیمروز ولایت د نورم او سټنډرډ ادارې مسؤولین وایي، چې له ایران څخه وارد شوي ۱۵۳ ټانکره بېکیفیته تېل یې تر ازموینې وروسته بېرته هغه هېواد ته ورګرځولي دي.
د نيمروز ولایت مقام په خپره کړې خبرپاڼه کې ویلي، چې یاد تېل د نورم ادارې په لابراتوار کې تر تخنیکي ارزونې وروسته د استفادې وړ نه وو بلل شوي.
د نیمروز د والي ویاند، قاري رحیمالله ساجد، ویلي چې له ایران څخه ټولټال ۲۵۰ ټانکره تېل وارد شوي وو، چې تر اوسه ۱۵۳ یې بېکیفیته ثابت شوي دي او پاتې ۹۷ ټانکره هم تر ارزونې لاندې دي، چې ښايي ډېر ژر بېرته واستول شي.
د نیمروز والي له ټولو تاجرانو څخه غوښتنه کړې چې د تېلو د وارداتو پر مهال معیارونه رعایت کړي.
نوموړي خبرداری ورکړی، که دا ډول بېکیفیته تيل بیا هم وارد شي، قانوني او جدي اقدامات به وشي.
نیمروز د تېلو له مهمو وارداتي دروازو څخه شمېرل کېږي، او د وارداتو د کیفیت کنټرول او د امارت له لومړیتوبونو څخه دی.
