کابل ټکی کام (دوشنبه، ۲۵ کب، ۱۴۰۴ل)
د ایران د سپاه پاسداران د عامه اړېکو دفتر اعلان کړی، چې د «وعده صادق ۴» عملیاتو د ۵۲مې څپې په ترڅ کې یو شمېر پوځي او صنعتي هدفونه په نښه کړي دي.
د سپاه په خبرپاڼه کې راغلي چې په دې عملیاتو کې د امریکایي ځواکونو د تجمع مرکزونه او ځینې صنعتي سیمې هدف ګرځول شوي دي.
سپاه ټینګار کړی، چې که د صهیونیستي رژیم لومړی وزیر بنیامین نتانیاهو ژوندی وي، نو تعقیب او د له منځه وړلو هڅې به یې په پوره ځواک سره دوام وکړي.
په اعلامیه کې ویل شوي، چې د امریکا او صهیونیستي رژیم د «ترهګریزو جنایتونو» په غبرګون کې، او د ایران د صنعتي ښارګوټو د شهید شوو کارګرانو د وینې د غچ اخیستو په لړ کې، د «یا زینب کبری (س)» په رمز سره ګډ عملیات ترسره شوي دي.
سپاه زیاتوي چې د تل ابیب پر صنعتي برخو د درنو توغندیو بریدونه شوي او د امبولانسونو پرلهپسې غږونه او د صهیونیستي ادارو اعترافات ښيي چې د مرګ ژوبلې شمېر زیات شوی دی.
همدارنګه د امریکا د ځواکونو د تجمع مرکزونه په درېیو پوځي اډو—الحریر (اربیل)، علي السالم او عریفجان—کې د ایراني توغندیو او ځواکمنو ډرونونو له لوري په نښه شوي دي.
د سپاه په وینا، د صهیونیستي رژیم د لومړي وزیر د برخلیک نامعلوم پاتې کېدل او د هغه د وژل کېدو یا له نیول شوو سیمو څخه د تېښتې احتمال د صهیونیستي رژیم د بحران او کمزورۍ نښه ده.
