کابل ټکی کام (سه شنبه، ۲۶ کب، ۱۴۰۴ل)
د یمن د انصارالله اسلامي غورځنګ د رهبرۍ شورا غړي محمد علي البختي په افغان پلازمېنه کابل کې د معتادینو د درملنې پر مرکز د پاکستان وروستي هوايي بریدونه په کلکو ټکو غندلي دي.
نوموړي “کابل ټکی کام” ویب پاڼې سره خبرو کې دغه برید یو «جنایت» بللی او ویلي یې دي چې پر روغتونونو او عامه تاسیساتو بریدونه هغه کړنې دي چې عموماً د صهیونیستي رژیم له لوري ترسره کېږي.
البختي زیاته کړې، چې دا ډول بریدونه د بشري اصولو او نړیوالو قوانینو خلاف دي او باید سمدستي ودرول شي.
هغه له ښکېلو لورو غوښتي چې له زغم څخه کار واخلي او د ملکي خلکو ژوند ته درناوی وکړي.
