کابل ټکی کام ۱۲حمل/۱۳۹۵، سمسور ګیلاني
ګوانتانامو زندان چې د متحده ایالاتو د پخواني ولسمشر د جورج بوش د واکمنۍ پر مهال د طالبانو او د القاعده تنظیم د جنګیالیو د بندي کولو او شکنجه کولو لپاره جوړ شو.
په دغه زندان کې چې له ډېره وحشته کار اخیستل کېدو، د بشري حقونو نړیوال سازمان هم دغه زندان د بشري حقونو څخه د سرغړونې ستر مرکز بللی وو، او ویلي یې وو، چې په دغه زندان کې بې له قضایي محکمو بندیان په کلونو کلونو ساتل کیږي.
د امریکا دفاع وزارت ویلي دي، چې د ګوانتانامو زندان څخه به دوو هېوادونو ته یو شمېر بندیان ولېږدوي.
ویل کیږي، چې راتلونکو څو اونیو کې به له ګوانتانامو زندان څخه یو شمېر بندیان وایستل شي.
دفاع وزارت د دغو دوو هېوادونو نومونه په ډاګه نه کړل، خو اوباما ویلي دي، چې دغه بندیان به خپلو هېوادونو او یا د امریکا پوځي او یا ملکي زندانونو ته ولېږدوي.
وړاندې داسې خبرونه خپاره شول، چې د امریکا ولسمشر اوباما د ګوانتانامو زندان د تړلو په اړه هلې ځلې پیل کړي دي.
په ۲۰۰۲میلادي کال په دغه زندان کې ۸۰۰ بندیان ساتل کېدل، خو دا مهال پکې ۹۱ زندانیان پاتې دي.
له بلې خوا په کانګرس کې د جمهوریت غوښتونکي ګوند یو شمېر غړو د دغه زندان د تړل کېدلو سره مخالفت ښودلی، او په ملکي زندانونو کې یې د دغو بندیانو ساتل کېدل خطرناک بللي.
