پاکستان وایي، چې یو افغان استخباراتي کارکوونکی یې نیولی
کابل ټکی کام ۱۸حمل/۱۳۹۵، احمدالله مهاجر
ډي نیوز نومې ورځپاڼې خبر ورکړی دی، چې ډېورنډ کرښې ته څېرمه د بلوچستان ایالت په چمن کې د امنیتي ادارو له لورې یو افغان استخباراتي کارکوونکی نیول شوی.
ډي نیوز همدا راز د پاکستان د سرحدي ځواک ویاند له قوله لیکلي دي، چې دغه افغان استخباراتي کارکوونکی د چمن په بوغره سیمه کې نیول شوی دی.
خبر وایي، چې دا مهال نیول شوی افغان استخباراتي کارکوونکی د تحقیقاتو لپاره بېول شوی دی.
د ډي نیوز په خبر کې راغلي دي، دغه افغان استخباراتي کارکوونکي د یوې سترې حملې پلان درلود، خو د امنیتي ادارو له خوا ونیول شو.
ډي نیوز نه د دغه ویاند نوم او نه هم د نیول شوي افغان استخباراتي کارکوونکي د نیولو نېټه ښودلې ده.
د یادولو ده، چې وړاندې هم پاکستان ادعا وکړه، چې په بلوچستان کې یې د هند یو استخباراتي کارکوونکی نیولی دی.
