کابل ټکی کام ۰۹غويي/۱۳۹۵، احمدالله مهاجر
د ننګرهار ولایت چارواکي وایي، چې نن سهار د دغه ولایت له څلورمې حوزې څخه د یوې غیر حکومتي بهرنۍ مؤسسې یوه بهرنۍ کارکوونکې د نا پېژانده وسله والو لخوا تښتول شوې ده.
د ننګرهار ولایت د والي ویاند عطاالله خوږیاڼي هم رسنیو ته تأیید کړې ده، چې تېر مازدیګر د نا معلومو وسله والو له خوا تښتول شوې ده.
خوږیاڼی وایي، چې دغې بهرنۍ مېرمن په یوه غیر حکومتي مؤسسه (ډاکار) کې کار کولو، او په دغه مؤسسه کې د ګلدروزۍ د برخې مسئوله وه.
خوږیاڼي همدا راز وویل، چې نوموړې ننګرهار ته په داسې شان سره راغلې وه، چې هېڅ حکومتي اداره یې نه وه خبره کړې.
نوموړی وایي، چې دغه مېرمن د جلال اباد په سپین غر هوټل کې شپه تېره کړې وه، نن سهار څلور بجې په څلورمه حوزه کې له خپل ولایتي دفتر څخه د نا معلومو وسله والو له لورې چې د امنیتي ځواکونو یونیفورم یې په غاړه وو، تښتول شوې ده.
ویل کیږي، چې یوازې دغه مېرمن د نا معلومو وسله والو هدف وه، ځکه چې په دفتر کې نورې ښځې هم موجودې وې.
د ننګرهار ولایت امنیه قومندان وایي، د د دغې پېښې په اړه یې څېړنې پيل کړي دي، چې تراوسه پورې یې د دغې پېښې په تور ۸ کسان نیولي دي.
دغه بهرنۍ د استرالیا هېواد اوسېدونکې وه.
تراوسه پورې د دغې ښځې د تښتولو په اړه هېچا هم څه نه دي ویلي.
د یادولو ده، چې د دغه ولایت په جلال اباد ښار کې د سترې محکې د رئيس حلیمي پلار هم د نا معلومو کسانو له خوا تښتول شوی وو، چې بیا وروسته د قومي مشرانو له لورې خوشی شو.
