سرلیکنه
دملي یووالي حکومت چې تر یودرځن زیاتو هېوادونو سره پوځي او دستراتیژیکوهمکاریو لاس لیکونه وکړل او سره دلاس لیکونو په افغانستان کې دجګړې لمن ورځ په ورځ پراخیږي روسانو هم دافغانستان سره دپوځي همکاریو دتړون چمتووالی وښود.
په کابل کې دروسیې سفیر الکزاندرماتیتسکي یوه خبري کنفرانس ته په خپله ویناکې دافغانستان دروانې بدې امنیتي وضع په اړه وویل افغانستان دامهال دډیرو سختو امنیتي او اقتصادي ستونزوسره مخ دی که دافغانستان سره ددې سختو حالاتو دله منځه وړلو په خاطر ژوره مرسته ونه شي تردې به هم دسختو امنیتي ستونزوسره مخ شي ، چې بیابه یې مهار کیدل ګران وي.
دماتیتسکي په وینا که افغانستان له روسیې وغواړي دروانو امنیتي حالاتو په مهارکولو کې ورسره مرسته کولای شي او دافغانستان د امنیتي ستونزو دکنترول لپاره ماتیتسکي دروسیې او افغانستان امنیتي موافقه اړینه وبلله .
په کابل کې دروسيې سفیر ماتیتسکي نهه میاشتې دمخه په یوه مرکه کې ویلي وو چې افغانان دې اوس پر روسیه کوم شک نه کوي چې بل پوځي تیری ته به لاره هواره شي ده وویل :
دروسيې دولتي لوړپوړو چارواکو څو څو واره دخپلونظامي مشرانو سره پرافغانستان په کړي پوځي یرغل دخپلې تیروتنې اعتراف کړیدی او زه افغانانو ته ډاډ ورکوم چې روسیه به بیا دالویه تیروتنه نه کوي.
ښه شوه چې په افغانستان کې روسي سفیر پرافغانستان دخپل پوځي یرغل په کولو اعتراف وکړ او خپله لویه تیروتنه یی وبلله خو هغه وخت به دملګرو ملتونو په غونډه کې چې دافغانستان په اړه جوړه شوې وه دکارمل په حکومت کې روسانو ته وفادار سلطان علي کشتمند وویل (لازم است تابه شکل دقیق ګفته شود که قوای اتحاد شوروی تنها وتنها به اعمال دفع مداخله ګرانه قوتهای خارجی که بیرون ازخاک افغانستان صورت میګیرد جهت همکاری خواسته شده است.)
اوس چې دملي یووالي حکومت دروسيې سره دګډې همکارۍ په نامه غوږونه نږدې کړیدي دا نیوکه پرې کیږي چې روسانو دافغانستان سره په ټولو کړو موافقو دملګرو ملتونو دمنشور دیوپنځوسمې مادې څخه سرغړونه وکړه او پرافغانستان یی پوځي یرغل وکړ.
افغانان څو څو واره دامریکا او روسېې دسیالیو ترمنځ راګیر شویدي دا اوس چې به کابل کې روسي سفیر دافغانستان سره د پوځي همکاریو او موافقی دلاس لیک چمتووالی ښې داهم دامریکا سره دروسېې دپخوانۍ سیالۍ پاتې برخه ده ، افغانانو هیڅ وخت دیوه هیواد سره هم دلاس لیک او یاکومې موافقې نه سرغړونه نده کړی خو امریکا، روسېې او نورو هیوادونو چې ځانونه افغانستان ته دوستان ورپیژنی دافغانانو سره ېې دچل او فریب نه کار اخستی دی .
روسانو په ۱۸۸۵م کال پنجده ونیوله افغانانو ورسره ځان جګړې ته تیارکړ روسانو افغان دولت نه وغوښتل چې پر بنجده دې ورسره جګړه نه کوي موږ به دتل لپاره پرافغانستان پوځی تیري نه کولو لاس لیک ورکړو افغانی چارواکو ورسره ومنله، روسانو په ۱۸۹۵م کال په رسمي توګه دافغانستان شمالی سرحدونه په رسمیت پیژندلو تسلیم کړل او لاس لیک یی وکړ.خو بدبختانه بیایې هم پرافغانستان پوځي یرغل وکړ.
دپخواني شوروي اتحاد ددفاع وزارت دسیاسي چارو دریاست سلاکار واسلي زاپلاتین، دلوې درستیز مرستیال جنرال اخراسیف، دبهرنیوچارو دوزارت مرستیال جنرال وارینکوف او نورو جنرالانو په وار وار په خپلو تیروتنو اعتراف کړیدی خو دادی بیا هم دخپلو سیاسي موخو دترلاسه کولو او دامریکاسره دزړې سیالۍ دپاللو په غرض دافغانستان سره پوځي همکاریو او تړون ته خپل چمتووالی ښیې.
دلته سوال دادی چې روسانو په افغانستان کی نهه کاله جګړه وکړه دافغانانو کورونه او ښارونه یی په کنډوالو بدل کړل اوس دکوم خطرله مخې دافغانستان سره لاس لیک کوي پرافغانستان خو امریکا یرغل کړی دی او تراوسه یی پکې پوځونه میشت دي نو ر دچانه خطردی او کوم ډول خطر؟
موږ منو چې دا وخت روسیه په منځنی ختیځ او منځنۍ اسیاکی اقتصادي رول لري او دا رول ېې پرافغانستان اغیز لري خو افغاني چارواکې او سیاستوال باید لږ څه دروسانو شالید ته هم متوجه شي چې دافغانانو سره ېې څه کړیدي ؟
اوس باید افغان چارواکې بیا دامریکا او روسيي ترمنځ دسیالیو ښکارنه شي افغان ځوانان غواړي په خپلې سیاسي انګیزې سره په افغانستان کې دپردیوداثرڅخه ازاد یو داسې سیاسی بدلون راولي چې دتل لپاره دپردیو دلاس وهنو څخه ازاد وي .
