کابل ټکی کام ۱۰غويي/۱۳۹۵، احمدالله مهاجر
په دې وروستیو کې ولسمشر اشرف غني د یوې بېړنی غونډې په دایرولو سره وویل، چې طالب بندیان به په اعدام محکوم کړي.
د اشرف غني له دغې خبرې څخه وروسته یو ځل بیا د دولتي رسنیو له خوا راپورونه خپاره شول، چې د طالب بندیانو د محکومو بندیانو د دوسیو د څېړلو غوښتنه شوې ده.
باید ووایو، چې ولسمشر غني دغه څرګندونې د کابل د سه شنبې له هغه برید وروسته وکړې، چې د ملي امنیت سلګونو مهمو امنیتي کارمندانانو ته یې درنده مرګ ژوبله واړوله.
دا مهال له طالبانو له لورې کابل ټکي کام ته په رالېږل شوې خبرپاڼه کې راغلي دي، چې د ولسمشر غني له خوا د بندیانو د اعدام پرېکړه به تر شا سخت عواقب ولري.
په اعلامیه کې راغلي دي، چې د بندیانو اعدام د کابل ادارې پر کمزورۍ ښکاره دلیل دی.
« د اشرف غني دا خبرې که له یوې خواد ده کمزوري ښکاره کوي چي خپل زور په بي وسه بندیانو ازمویې، له بلي خوایې دا کړنې هيڅ قانوي او حقوقي حيثیت نلري، ځکه مظلوم سیاسي بنديان د داسي قضايي ارګان له لوري په اعدام محکوم شوي چې په نړۍ کې يې په بې کفايتۍ او فساد کې لومړۍ درجه ترلاسه کړی اوپه اعدام محکوم شوي اکثره هغه غریب بندیان دي چي دخپل اقتصادي ضعف له امله یې درژیم قاضیانو او څارنوالانو ته رشوتونه نشوای ورکولای اونن دخپلې بي وسۍ سزا ویني، د کابل ادارې دغه ډول کړني به يوازي يو جنګي جنايت وي چې د آزادۍ غوښتونکو مظلومو، او بې دفاع بندیانو په حق کې به ترسره کيږي، په داسې حال کې چې بندیان په زندان کې دي او په بندي حالت کې يي وژل دکابل شړیدلي رژیم ته هیڅ کټه نشي رسولای؛ خو داکار به طبعا تر شا سخت عواقب ولري.»
د طالبانو په اعلامیه کې د کابل ادارې ته ګواښ شوی دی، که بندیان اعدام کړي، نو دوی به په هغو لارو کې ټول هغه څه په کار واچوي، چې په توان کې یې دي.
«که دښمن په دغه ډول جنایت لاس پورې کړي، نو اسلامي امارت به دخپل مظلوم ولس څخه د دفاع په لاره کې ټول هغه څه وکړي چې په توان کې يې وي، يوځل بیا به د دښمن په اصطلاح عدلي ارګانونه دخپل ممکنه جنایت دروند قیمت پريکړي، هغه پيژندل شوي اشخاص، یا ټولنې چې د داسې جنایاتو غوښتونکي او وړانديزکونکي دي د هغوی او دهغوی د اړوندانو په هکله به هم مجاهدین بې تفاوته پاتې نشي او نور به په کلي او جزئي ډول دنظامي اهدافو په قطار کې داخل کړل شي، دکابل مزدور رژیم به په خپل دې اقدام سره دعام ولس او مجاهدینوداحساساتو په راپارولوسره له فاریابه ترهلمنده اوله بدخشانه ترخوست پوري په ټول هیوادکې چې د اسلامي امارت په زندانونو کې د اشغالګرو هیوادونو اړونده اتباع او دمزدورې ادارې عسکر له مجاهدینو سره بندیان دي دهغوی ژوند ته به جدي خطر متوجه کړي، اسلامي امارت هميشه د بندیانو سره په عدلیه امورو کې د اسلامي اصولو مطابق له نهايي سهولت څخه کار اخیستی دي، که دښمن له بندیانو سره داسې چلند غوره کړي، لکه چې يې ویلي دي او اصلاح نشي، بیا به زموږ شرعي محاکم دشریعت له اصولوسره سم په نهايي مجازاتو باندې غور وکړي.»
طالبانو د اعلامیې په پای کې د بشري حقوقو د دفاع پر نړیوالو ادارو، خپلواکو رسنیو، سور صلیب او نورو ازادو او بې پرې سازمانونو باندې غږ کړی دی، چې د بندیانو د اعدام په موضوع کې له خپل اثر او رسوخ څخه په استفادې بې تفاوته پاتې نه شي.
