سميع الله تړون ـ اسد اباد
دار ته مې پورته کړه اعدام ته مې ور ورسوه
له تندې مرم کوثري جام ته مې ور ورسوه
ما په دې لاره کې خپل ټول ګامونه سم ايښي دي
د ژوندانه اخري ګام ته مى ور ورسوه
د بې غيرتو په کاسه کې ډوډۍ مه راکوه
دې خپل شهيد غيرتي قام ته مې ور ورسوه
يوه زلمي رب ته لاسونه لپه کړي وايي
د مظلومانو انتقام ته مې ور ورسوه
توتکۍ خپل وزر ته مخ کړ ويل بلا دې واخلم
دې ابرهه غوندې سرسام ته مې ور ورسوه
روح مې د ژوند توره پنجره کې ستړى شوى دى نور
روح مې ارام غواړي ارام ته مې ور ورسوه
راشه شهيد مې کړه او زړه راباندې ونه سيزې
دا مې هدف دى دې مرام ته مې ور ورسوه
تړونه پام کوه په توره دې څوک ونه ولي
کابل نه وځه او بګرام ته مې ور ورسوه
