کابل ټکی کام ۱۵غويي/۱۳۹۵، سمسور ګیلاني
د شپاړس کلن فلسطیني ځوان محمد ابو خضیر سوځوونکی اسرائیلي د یوې اسرائیلي محکمې له لورې په عمري بند محکوم شو.
دغه فلسطینی ځوان چې محمد ابو خضیر نومیږي، دوه کاله وړاندې د ۳۱ کلن سرتیري یوسف حییم بن ډېوېډ له لورې ژوندی سوځول شوی وو.
وړاندې هم اسرائیلي حکومت ویلي وو، چې ابو خضیر د «ترهګرۍ» قرباني شوی دی.
ویل کیږي، له بن ډېوېډ سره د ابو خضیر په سوځولو کې دوو نورو اسرائیلیانو چې عمرونه یې ۱۶ او ۱۷ دي، مرسته کړې وه.
د ابو خضیر پلار حسین ابو خضیر اسوشېټډ خبري اژانس ته ویلي دي، چې زړه یې د بن ډېوېډ وژنه په زندان کې غواړي.
د یادولو ده، چې دغه وحشتناکه او بې رحمانه پېښه په داسې شان سره رامنځته شوه، چې د درو اسرائیلیانو له لورې محمد ابو خضیر له یوه واټه وتښتول شو، او د ټوپک د کونداغونو په وهلو سره یې بې هوښه کړ، او په یوه ځنګله کې یې تېل پرې وپاشل، او اور یې ور واچوو.
