کابل ټکی کام ۲۷غويي/۱۳۹۵، سمسور ګیلاني
د نړیوالو خبري رسنیو د خبر له مخې چې د اسرائیلي پوځیانو د ډزو له کبله یو فلسطینی وژل شوی دی.
د فلسطین امنیتي سرچینو خبر ورکړی دی، چې د اردن د سیند لویدیځې غاړې ته په نابلس ښار کې د اسرائیلي پوځيانو د ډزو له کبله یو فلسطنی وژل شوی دی.
دغو امنیتي سرچینو ویلي دي، دغه فلسطینی په داسې حال کې وژل شوی دی، چې اسرائیلي پوځیانو د دغه ښار په مختلفو سیمو کې د خلکو کورونه تلاشي کول.
سرچینې زیاتوي، چې په دغو تلاشیو کې اسرائیلي پوځیانو درې ځوانان هم نیولي دي.
په ورته وخت کې المنار ټي وي چینل خبر ورکوي، چې دغه فلسطینی د اردن سیند لویدیځې غاړې په باب العامود قدس سیمه کې وژل شوی دی.
باید ووایو، چې د اسرائیلي پوځیانو له لورې ورته پېښې ډېرې شوي دي، چې د همدې پېښو له کبله د فلسطینیانو د مرګ ژوبلې کچه هر کال لوړیږي.
د یادولو ده، چې د روانې میاشتې په ۱۷مه نېټه هم په غزه کې د اسرائلي ټانګ په ډزو کې یوه فلسطینۍ مېرمن وژل شوې وه.
