تبصره / هېواد خوږیاڼی
د اساسي قانون له مخې هر افغان حق لري، چې د خپلو روا غوښتنو لپاره سوله ییز لاریون وکړي او خپل حق وغواړي؛ خو که چېرې دغه لاریونونه د حکومت د ننګولو لپاره وي، حکومت یې اجازه نه ورکوي.
لاریونونه د نړۍ په ډېرو هېوادونو کې کېږي او خلک خپلې غوښتنې حکومت ته وړاندې کوي او حکومتونه هم د خپلو خلکو د غوښتنو د منلو لپاره ددوی لاریونونو ته اجازه ورکوي.
افغانستان ته ځینې فرهنګونه بد راغلل او یا دلته خلکو بد کړل. دلته لاریونونه د ملي ګټو لپاره نه کېږي، بلکې ملي ګټې ننګوي او قومي ټیکه داران ددغه لاریونونو په وسیله خپلې شخصي ګټې لټوي.
نن د «روښنايي غورځنګ» په کابل کې لاریون وکړ او د کابل زیاتې لارې او سړکونه یې تړلي وو. لاریون کوونکو د ټوټاپ پروژې پلی کېدل په سالنګ نه، بلکې په بامیانو غوښت. لاریون کوونکو په حکومت هم د مرګ شعارونه ورکول او خپل زور یې په یوه نه یوه ډول حکومت ته وښود.
د نني لاریون سر لاري د اوسني ګډ حکومت د مشر اشرف غني دویم مرستیال سرور دانش، د مخکني ولسمشر حامد کرزي دویم مرستیال کریم خلیلي، د اجراییه ریاست دویم مرستیال محمد محقق او ځینې نور هزاره ټیکه داران وو.
نن ښه و، لاریون په سوله ییز ډول پای ته ورسېد، نه پکې څوک ټپیان شول او نه پکې نښته رامنځته شوه.که چېرې احیاناً په نني لاریون کې نښته رامنځته شوې وای، نو پایلې به یې اوسني حکومت او د افغانستان ملت ته بدې وې، ځکه زموږ زیات ګاونډیان په دې هڅه کې دي، چې افغانان په خپلو منځونو کې په قومي جنګ واړوي او خپلې وسلې دلته وپلوري.
افغان حکومت ته پکار ده، چې دداسې قومي رنګه لاریونونو مخه ونیسي او د ټوټاپ مسیر مسله دې تخنیکي برخې ته پرېږدي، چې کومه لاره یې غوره او ارازانه ده، ځکه دغه پروژه ملي ده، نه قومي.
هزاره ټیکه دارانو ته پکار ده، چې نور د پردیو په لمسون د افغان ملت د وېشلو هڅې نه کوي، ځکه باداران به یې بیا په تش میدا ن پرېږدي او بیا لاسونه مروړي، خو وخت به تېر وي.
