کابل ټکی کام ۱۱غبرګولي/۱۳۹۵، احمدالله مهاجر
د روزګان ولایت ولایتي شورا ویلي دي، که د دغه ولایت ګېزاب ولسوالي ته تازه دمي سرتیري ونه لېږدول شي، ولسوالۍ سقوط کوي.
د روزګان ولایت د ولایتي شورا رئیس عبدالکریم خادمزي ویلي دي، چې د دغه ولایت د ګېزاب ولسوالۍ د تېرې شپې په جګړو کې ۱۱ پوستو سقوط کړی دی.
یوې امنیتي سرچینې چې د نوم اخیستو څخه یې ډده کړې ده، رسنیو ته ویلي دي، چې طالبانو تېره شپه د روزګان ولایت ګېزاب ولسوالۍ کې پر امنیتي پوستو کارنده بریدونه ترسره کړل.
سرچینې وویل، چې د طالبانو د دغو عملیاتو په پایله کې د سیند پر غاړه له ۷ پوستو څخه لسګونو پولیسو پښې سپکې کړي دي، او د دایکندي په لور تښتېدلي دي، او پوستې یې طالبانو ته پريښي دي.
سرچینې زیاته کړه، تر سهاره پورې د طالبانو له لورې پر یو شمېر پوستو بریدونه روان وو، چې په پایه کې یې یو شمېر پوستې د طالبانو لاسته ولوېدې.
له بلې خوا د طالبانو ویاند ښاغلي قاري یوسف احمدي د رسنیو له لارې خبر ورکړی دی، چې د دایکندي ولایت د ګېزاب ولسوالۍ اړوند په سنګ شیخ سیمه کې، له دولتي ځواکونو څخه ۸ پوستې او ۸ نور سرایونه چې افغان ځواکونو ترې د مرکزونو په توګه کار اخیستلو، په ټولیزه توګه د دوی لاسته لوېدلي دي.
ښاغلي احمدي مقابل لوري ته د درندو تلفاتو اړولو خبر هم ورکړی دی، او همدا راز یې دعوه کړې ده، چې له دولتي ځواکونو څخه یې ۱ رېنجر موټر، ۲۱ کلاشنکوفونه او ګڼې نورې وسلې او مهمات لاسته راوړي دي.
احمدي په سیمه کې د درندې جګړې د دوام خبر ورکړی دی، او ویلي یې دي، چې د افغان ځواکونو پر خلاف یې تصفیوي عملیات پیل کړي دي.
