کابل ټکی کام ۱۴غبرګولي/۱۳۹۵، سمسور ګیلاني
د امریکا د متحده ایالاتو د جمهوري غوښتونکي ګوند څخه مخکښ نوماند ډونالډ ټرمپ نن جمعه یوې خبري غونډې ته د وینا پر مهال وویل، چې د ایمیلونو د رسوايۍ له کبله کلنټن باید زندان ته ولاړه شي.
ټرمپ دغه څرګندونې د کلېنټن د هغو خبرو په ځواب کې کړي دي، چې نوموړې د ټرمپ تفکرات عجیب، نا مربوط او درواغجن وبلل.
ټرمپ د کلېنټن په وړاندې له غوسې څخه ډکې او ناوړه څرګندونې وکړې، او زیاته یې کړه، چې هېلري کلېنټن ته په انتخاباتي رقابت کې برخه ورکول به د امریکا او زمونږ د امنیتي ارګانونو لپاره ستر شرم وي.
ټرمپ د وینا پرمهال زیاته کړه، ښايي د کلېنټن له لورې په رسوا شویو برېښنا لیکونو کې محرمانه اطلاعات وي، جې له کبله يې باید نوموړې زندان ته ولاړه شي.
ډونالډ ټرمپ د امریکا په نوماندانو کې یو ستر جنجالي نوماند دی، چې د یو شمېر امریکايي چارواکو سربېره ورسره د خپل ګوند غړي هم خلاف دي.
د یادولو ده، ډونالډ ټرمپ او هیلري کلېنټن دواړه مخکښ، رقابتي سیالان دي.
