نن د هرات-تورغونډۍ د اورګاډي پټلۍ د جوړولو په اړه څېړنه پیل شوه

کابل ټکی کام ۲۰غبرګولي/۱۳۹۵، احمدالله مهاجر
د هرات ولایت ځايي چارواکي وايي، چې نن یې د هرات-تورغونډۍ د اورګاډي پټلۍ جوړولو په اړه څېړنه پیل کړه.
د هرات ولایت څخه په خپره شوې خبرپاڼه کې راغلي دي، چې په دغه پروژه یې کار پیل کړی دی، چې تر راتلونکو شپږو میاشتو پورې به بشپړه شي.
خبرپاڼې لیکلي دي، دغه پروژه شپږ سوه زره ډالره لګښت لري، چې شاوخوا ۲۰۰ کیلو متره اوږدوالی لري.
دغه پټلۍ له کشک کهنه، کشک رباط سنګي، ګلران، انجیل او ګذرې ولسوالۍڅخه تیریږي، چې ان تر هوايي ډګره پورې به غځول کیږي.
د هرات ولایتي ویاند جیلاني فرهاد دغه پروژه د هېواد لپاره یوه ګټوره او با ارزښته پروژه وبلله، او زیاته یې کړه، چې دغه پټلۍ به په پای کې له هرات خواف پټلۍ سره نښلول کیږي، چې ایران او هرات به د منځۍ اسیا له هېوادونو سره ونښلوي.
ده وویل، چې د دې پروژې په بشپړېدو سره به افغانستان د منځنۍ اسیا بازارونو ته لاسرسی وموندي.
د یادولو ده، چې دغه پټلۍ د افغانستان د ملي اورګاډي پټلۍ یوه برخه ده، چې بشپړېدنه به یې یو شمېر ولایتونه سره ونښلوي.