کابل ټکی کام ۲۸غبرګولي/۱۳۹۵، احمدالله مهاجر
د افغانستان پخواني ولسمشر حامد کرزي د بي بي سي اردو سره په یوه مرکه کړې ده، چې د ډیورنډ کرښې پر سر څرخیږي.
ښاغلي حامد کرزي په دغه مرکه کې ډيورنډ کرښه یو نه هېرېدونکی زخم یاد کړ، او زیاته یې کړه، چې «ډیورنډ کرښه یو داسې زخم دی، چې هېڅ افغان به یې هېر نه کړي.»
ده وویل، چې افغانستان نه ډیورنډ کرښه منلې، نه یې مني، خو پر همدې جګړه هم کول نه غواړي.
ده د خپلو خبرو په جریان کې وویل، چې افغان ولس له پاکستان څخه خوشاله دی، خو د حکومت له کړنو څخه یې ناراضه دی.
حامد کرزي د پاکستان هغه ادعا رد کړه، چې ګواکي افغانستان د بل چا په لاس کې دی، او د پاکستان پر خلاف یې کاروي.
«افغانستان یو خپلواک هېواد دی، د هېچا په اشارو نه چلیږي.»
ښاغلي حامد کرزي وویل، کومې غوښتنې چې پاکستان له مونږ څخه لري، هغه افغانانو ته هېڅ د منلو وړ نه دي.
«پاکستان غواړي، چې افغانستان او هند ترمنځ دې هېڅ اړیکې او سوداګري نه وي، هند ته د افغانستان له لارې منځنۍ اسیا ته لاس رسۍ نه وي، دا خبرې افغان ولس ته هېڅ د منلو وړ نه دي.»
حامد کرزي وویل، چې «ترهګري» د پاکستان ولس ته هم ډېر ټپونه ورکړل، خو همدغه ترهګري پاکستان جوړه کړه، هغه تربیه کړه، هغه ورته موقع برابره کړه.
ده له پاکستان څخه غوښتنه وکړه، چې د ترهګرو ملاتړ پرېږدي، او په رښتیني ډول یې دې د ختمېدو لپاره اقدامات وکړي.
د حامد کرزي په وینا که چېرې پاکستان د «ترهګرو» پر خلاف رښتیني اقدامات وکړي، نو په دواړو هېوادونو کې به ثبات رامنځته شي.
ده د خپلې غوښتنې په ترڅ کې وویل، چې پاکستان دې افغانستان ته د یوه خپلواک هېواد په سترګه وګوري، او دا دې نور نه ورته وایي، چې له هند سره اړیکې مه کوئ.
د یادولو ده، په دې وروستیو کې د افغان او پاکستاني ځواکونو ترمنځ په تورخم کې سختې نښتې رامنځته شوې، چې له کبله یې دواړو لوریو ته مرګ ژوبله واوښته.
