سرلیکنه
د افغانستان د بهرنیو چارو وزارت وايي: په وزارت کې ېې د بهرنیو اړیکو د مرستیال حکمت خلیل کرزي په مشرۍ یو پلاوی اسلام اباد ته د تورخم شخړې د حل په موخه روان دی .
په تورخم کې د درې ورځې جګړې وروسته په اسلام ابادکې افغان سفیر عمر زاخیل وال د پاکستاني چارواکوسره په خبروکې په دې وتوانیدو، چې په تورخم کې اوربند وکړي او مذاکراتو ته لاره هواره کړي.
په ورته وخت کې دپاکستان د صدراعظم نواز شریف سلاکار سرتاج عزیز د افغان دولت دوو تنوغړو (د ملي امنیت د شورارئیس حنیف اتمر او د بهرنیوچارو وزیر صلاح الدین رباني) ته دتورخم دشخړې په اړه اسلام اباد ته بلنه ورکړه .
افغان دولت اسلام اباد ته د بهرنیو چارو د وزارت مرستیال حکمت خلیل کرزی، چې دمخه ېې دپاکستاني چارواکو سره په هیواد کې د سولې په اړه په وار وار مذاکرات کړي دي، د تورخم د شخړې دحل په موخه ېې هم د ښو پایلو لرلو په تمه د یوه پلاوي په مشرۍ غوره وبللو .
د تورخم دشخړې نه د هېواد شخړه څو چنده د افغانستان ارضي تمامیت، د بې ګناه افغانانو وژنه، په کلو او کورونو، په ودونواو جنازو د امریکا د بې پیلوټه الوتکو د بمباریو په نسبت کمه ده، خو همدا په ظاهره کمه مسئله د روان حالت په دوام د دواړو هېوادونو ترمنځ په ستر کړکیچ هم بد لیدای شي.
په افغانستان کې د سولې په اړه د ملګروملتونو، امریکا، د سیمې نورو هېوادونو سیاست ته په کتوسره سیاسي شنونکي دانه شي ویلی، چې د پاکستان سره دې د تورخم مسئله، چې انګلیسي قوتونو د دواړو هېوادونو ترمنځ د دا ډول حالاتو د رامنځ ته کېدو لپاره پریښې ده، په اسانۍ سره په یو پړاو کې حل شي.
دا امکان هم لري، چې د هېواد د نا معلومې سولې په څېر دا خبرې هم پړاوونه وخت واخلي.
امریکا اوبرتانیه که په ظاهره په خپلو کې د خپلو ګټو په خاطر یوڅه اختلاف لري، خو د اسلامي هېوادونو او په ځانګړي توګه د افغانستان په اړه سره یو نظر لري، لکه څرنګه چې نه غواړي د افغانستان جګړه پای ته ورسیږي دا ډول د توخم دمسئلې حل غوښتونکي هم نه دي .
د امریکا د بهرنیو چارو د وزارت ویاندجان کري ویلي: افغانستان او پاکستان دواړه هېوادونه دې د تورخم مسئله په خپلو کې حل کړي، خو خپله ېې د حل او منځګړتوب څخه انکار کړی دی. له دې څخه داڅرګنده شوه، چې امریکا د افغانستان او پاکستان دواړو هېوادونو د منځګړتوب په نه کولو شریک دښمن دی .
که د تورخم دشخړې حل یواځې د دواړو هېوادونو د سیاسي اهدافو په نظر کې نیولو پورې محدود کړل شي نو بیا خو به ددې کړکیچ حل یوڅه ګران شي اوکه د دواړو هېوادونو علماءکرام او قومي مشران پکې شریک شي او د جرګې له لارې پرې خبرې پیل شي، د دواړو هېوادونو د شریکو ګټو په نظر کې نیولو سره به ېې یوه حل لاره وموندل شي.
د ډیورنډکرښه، چې انګریز دپاکستان او افغانستان ترمنځ د تاوتریخوالي د رامنځته کېدو او د پښتون ولس پر سینه ېې د بیلتون چاړه راښکلې ده، که دواړه هېوادونه غواړي په خپلو کې سره تل په ښه ګاونډیتوب کې پاتې شي نو په خپلوکې د نه موافقې وروسته باید د ملګروملتونو په کچه پرې خبرې وکړي او د یوې عادلانه پرېکړې له مخې، چې د دواړو هېوادونو رضایت پکې په نظر کې ونیول شي، د تورخم مسئله حل کړي، دابه دواړوهېوادونو ته په خیر او ګټه تمامه شي .
لکه څرنګه چې مخکې مو یادونه وکړه، ددې مسئلې حل یواځې د دواړو غاړو د اوسیدونکو، صادقانه او ریښیني عالمانو سره کیدای شي اوبس.
دا اوس، چې دحکمت کرزي په مشرۍ افغان پلاوی ټاکل شوی،ددوی په حکمت اوسیاسي پوهاوي پورې اړه لري، چې په اسلام ابادکې به دپاکستاني چارواکو سره د تورخم په مسئله موافقې ته ورسیږي او که به دملګروملتونو تالار ته پاتې شي.
