بادغيس: د اردو یو سرتیري خپلو ۷ ملګرو ته مرگ ژوبله اړولې
کابل ټکی کام ۱۳۹۵ چنګاښ ۲ زرغون خوږیاڼی
د بادغيس جوند ولسوالۍ کې د ملي اردو په يوه پوسته کې يوه سرتېري پر خپلو ملگرو بريد کړی، چې امله يې اوو تنو ته مرگ ژوبله اوښتې ده.
سيمه کې د ملي اردو د دريمې لوا قوماندان ډگروال شېر محمدي رسنيو ته ويلي، چې پېښه تېر مازديگر د جوند ولسوالۍ په تور کوتل سیمه کې رامنځته شوې ده.
هغه وايي چې د يادې پوستې يوه سرتېري لومړى خپل څلور ملګري وژلي او درې نور يې ټپيان کړي دي او بيا د پوستې بل سرتېري دغه بريدګر هم په ډزو وژلى دى.
طالبانو د بريد پړه پر غاړه اخيستې او رسنیو ته یې په یوه لیږل شوې خبر پاڼه کې ویلی، چې بريد د دوی نفوي ملگري عيد محمد ترسره کړی، چې د ننگرهار اوسېدونکی و.
طالبانو تائيد کړې ده، چې عید محمد هم ددښمن په متقابلو ډزو کې وژل شوی دی.
