کابل ټکی کام ۰۵چنګاښ/۱۳۹۵، سمسور ګیلاني
د امریکا متحده ایالاتو په ویرجینا ایالت کې د شدیدو باراونو له کبله لږ تر لږه ۲۳ کسان وژل شوي دي، او شاوخوا ۱۰۰ کورونه په ټولیزه توګه نړېدلي دي.
د لویدیځې ویرجینیا مسئول ارل رای خبري رسنیو ته وویل، چې د ۷ ساعتیز شدید باران څخه وروسته په سیمه کې قوي سېلابونه راغلل، چې دغه ناورين یې رامنځته کړ.
ده وویل، سېلابونو په سیمه کې ګڼ مالي او ځاني زیان اړولی دی.
د ده له قوله چې تراوسه پورې د دغو سېلابونو له کبله ۲۳ کسان وژل شوي دي، او ښایي دا شمېره نوره هم لوړه شي.
ارل رای وویل، چې په ۴۴ ولسوالیو کې یې بېړنی حالت اعلان کړی دی، او د ملي حفاظت ۱۵۰ سرتیري د مرستو په موخه استول شوي دي.
نوموړى زیاتوي، چې دا په سیمه کې له تېرو سلو کلونو راهیسې تر ټولو ستر طبعي ناورین دی.
له بلې خوا د لویدیځې ویرجینیا کې د ریونسو د سیمې د اطفایي دفتر له خوا په ورکړل شويو معلوماتو کې راغلي دي، چې په سېلابونو کې د بې درکه شویو کسانو څخه د یوه ۸ کلن ماشوم مړی موندل شوی دی.
د دغه ایالت چارواکو ویلي دي، چې د سېلابونو له کبله ګڼې لارې او سړکونه له منځه تللي دي، ۱۰۰ کورونه په ټولیزه توګه وېجاړ شوي دي، پلونه نړېدلي دي.
دوی وویل، چې د همدې ارتباطي لارو وېجاړېدنې، د مرستې رسونې چارو مخه ډب کړې ده.
د دوی د معلوماتو له مخې چې په دغو سېلابونو کې ۵۰۰ زره تنه د برېښنا څخه محروم شوي دي.
