کابل ټکی کام ۰۶چنګاښ/۱۳۹۵، احمدالله مهاجر
له څو میاشتو راهیسې په رسنیو کې راپورونه ورکول کیږي، چې ایران افغان کډوال سوریې ته د بشاراسد په ملاتړ د جګړې لپاره استوي، مګر افغان حکومت یې په اړه هېڅ کوم پلان نه دى درلودلى.
دا دى باالاخره د بشار اسد مخالفینو افغان حکومت ته یو لیک استولی دی، چې په هغې کې له دوی څخه غوښتنه شوې ده، تر څو د دغو افغانانو مخه ونیسي.
افغان حکومت ته نږدې یوې سرچینې رسنیو ته ویلي دي، چې لیک ور رسېدلی دی، او وايي، چې ولسمشر د جګړې نه، بلکې د سولې پلوی دی.
دغه سرچینه وایي، چې افغان حکومت له نورو دولتونو سره په اړیکه کې دی، نه له کومو ډلو سره.
دغه لیک چې یو شمېر رسنیو خپور کړی دی، له افغان حکومت څخه پکې غوښتنه شوې ده، چې د هغو افغان جنګیالیو مخه دې ونیسي، چې ایران یې د بشاراسد د ملاتړ لپاره جګړې ته استوي.
په لیک کې راغلي دي، چې افغان جنګیالي په سوریه کې د بشاراسد ځواکونو په ملاتړ د ایران د اخندي رژیم په امر د سوریې خلک وژني، او په جنګي جنایتونو یې لاس پورې کړی دی.
د افغانستان د بهرنیو چارو وزارت ویاند احمد شکیب مستغني د دغه لیک په تأیید کې ویلي دي، چې له دغه لیک سربېره د ګڼو نورو راپورونو له مخې هم په سوریه کې د افغان جنګیالیو له استعمال څخه خبر دي.
دی وايي، چې یو شمېر داسې کوربه هېوادونه هم شته دي، چې له افغان کډوالو څخه په ناوړه توګه ګټه اخلي.
ښاغلي مستغني زیاتوي، چې افغان حکومت به دغه مسئله له ډیپلوماتیکو لارو څخه حل کړي، او د دغې موضوع په تړاو یې د کډوالۍ له نړیوالو سازمانونو سره په اړیکه کې دی.
د یادولو ده، د راپورونو له مخې چې څه دپاسه اته زره افغان جنګیالي د ایران په امر د بشاراسد د نظام په ملاتړ په جګړه بوخت دي.
