د امریکا دالاس کې د وژل شویو پولیسو شمېر ۵ تنه وښودل شو

کابل ټکی کام ۱۸چنګاښ/۱۳۹۵، سمسور ګیلاني
د امریکا د ټکساس ایالت په دالاس ښار کې د پنجشبې شپې د مظاهرو پر مهال د ډزو له کبله پنځه تنه پولیس وژل شوي دي، او اته نور ټپيان دي.
دغه مظاهرې د پولیسو له خوا د دوو تور پوستو سړو د وژل کېدو په غبرګون کې شوي دي.
پولیسو هغه دوه تور پوستي د امریکا په مینه سوتا او لویزیانا ایالتونو کې وژلي وو.
د دالاس د پولیسو مشر ویلي دي، پر دوو کسانو یې د ډزو کولو ګومان دی، چې دا مهال یې د پلټنې په هڅه کې دي.
اسوشټډ پرس اژانس د یوه عیني شاهد له خولې وايي، چې «د بام له سره ډزې وشوې».
عیني شاهدان وايي، چې تر لسو زیاتې ډزې یې اورېدلي دي.
د پېښې لومړنی خپرې شوې ویډیوګانې ښيي، چې دوه تنه پولیس د واټ پر سر لوېدلي دي.

د برید مسئولیت د (تور پوستو د سیاسي ځواک ادارې) نومي ډلې پر غاړه اخیستی دی.
د یادولو ده، لومړی د رسنیو له لارې د دغې پېښې د قربانیانو شمېر ۳ تنه په ګوته شو، خو دا مهال له څېړنو وروسته پر پنځو تنو تأکید شوی دی.