داعش څو میاشتې وروسته د خپل مهم مشر د وژنې پخلی وکړ
کابل ټکی کام ۲۴چنګاښ/۱۳۹۵، سمسور ګیلاني
داعش ډلې څو میاشتې وروسته، د رسنیو له لارې ومنله چې یو مهم مشر عمر الشیشاني وژل شوی دی، دا په داسې حال کې چې څو میاشتې وړاندې امریکایي چارواکو د ده د وژنې خبر ورکړی وو.
پنټاګون په تېره مارچ میاشت کې خبر ورکړی وو، چې د داعش ډلې مهم مشر الشیشاني د سوریې په شمال ختیځ کې د امریکا په یوه هوايي برید کې په نښه شوی دی.
دا مهال د داعش ډلې په اعماق خبري اژانس کې د عمر الشیشاني د وژنې پخلی شوی دی، او ویلي یې دي، چې نوموړی د عراق د موصل په سوېل کې د شرقاط ښار په جګړه له منځه تللی دی.
د وژل شوي داعشي مشر اصلي نوم (تار خان باتیرا شویلي) و، چې په «عمر چیچني» سره یې شهرت موندلی وو.
الشیشاني ته وړاندې د سوریې په شمال کې د دغې ډلې پوځي مسئولیت ور په غاړه وو.
دغه اژانس د الشیشاني د وژل کېدو نېټه نه ده په ګوته کړې، خو جزیات یې د پنټاګون د مارچ میاشتې له بیانیې سره ډاګیز ټکر لري.
دغه سور ږیری داعشي مشر د دغې له بنسټګر البغدادي ته له نږدې کسانو څخه وو.
اعماق خبري اژانس دغه خبر په داسې حال کې خپروي، چې په مارچ میاشت کې یې د پنټاګون همدغه ادعا رد کړې وه.
د یادولو ده، الشیشاني د داعش ډلې د شورا مهم غړی وو.
