هلمند مارجه کې درنده جګړه روانه ده

کابل ټکی کام ۲۴چنګاښ/۱۳۹۵، احمدالله مهاجر

د هلمند ولایت مارجې ولسوالۍ څخه د درندې جګړې راپورونه ورکړل شوي دي، ویل کیږي، چې په جګړه کې له سپکو او درندو وسلو څخه کار اخیستل کیږي.
د هلمند ولایت څخه خبري منابع وایي، چې د دغه ولایت د مارجې ولسوالۍ اړوند د ډرآب چار راهي او کیمپ تر منځ لښګرګا ته پر غزېدلي سړک د افغان ځواکونو او طالبانو ترمنځ درنده جګړه روانه ده.
خبرونه وایي، جګړه چې نن سهار پیل شوې ده، لا هم په شدت سره دوام لري.
د ترلاسه شویو خبرونو له مخې، جګړه هغه مهال رامنځته شوه، کله چې کومندويي عسکر، پولیس او اربکیان د ټانګونو او رېنجرو سره سیمې ته د عملیاتو په موخه ورغلي وو.
طالبانو هم د یوې خبرپاڼې په خپرولو سره د دغه پخلی کړی دی، او ویلي یې دی، چې د مقابل لوري ۵ ټانګونه یې د راکټ او هشتادو په مټ ویشتلي دي، چې په کې سپرو ۱۶ سرتېرو ته مرګ ژوبله اوښتې ده.
طالبان وایي، وېجاړ شوي ټانګونه اوس هم د جګړې په ډګر پاتې دي، او د راغلې قوې پر مخ لاره بنده ده.

خبرپاڼه کې د یوه امریکايي ټوپک او امریکایي ثقیل د نیولو ادعا هم شوې ده.
طالبان ادعا کوي، چې دوی ته تراوسه پورې کوم زیان نه دی اوښتی.