کابل ټکی کام ۱۳۹۵ زمری ۷ زرغون خوږیاڼی
شرق پېژندونکی او د تل ابیب پوهنتون اسرائيلي استاد اییال زیسر وايي: په ترکیه کې له ناکامې کودتا نه په کټې اخیستنې سره، اردوګان یو ځل بیا په ترکیه کې د عثماني خلافت راوستل غواړي.
په اسرائیلي ورځپاڼه «اسرائيل الیوم» کې د زیسر یوه لیکنه خپره کړې، چې په کې یې لیکلي: اردوګان په ترکیه کې له ناکامې کودتا نه په کټې اخیستنې سره یو ځل بیا ترکیه د عثماني خلافت په لور بوځي او غواړي چې د عثمانیانو وارث او ځای ناستی پاتې شي.
لیکوال زیاته کړې، چې اردوگان یو کامیاب سیاست وال دی، چې په لنډې مودې کې یې وکولای شول په پولیسو، استخباراتو، او قضايي ارګانونو کې ځای پیدا کړي او له دې وروسته غواړي چې پوځ او تعلیمي برخې کې هم خپل نفوذ زیات او یو لړ بدلونونه په کې راولي.
یاد مستشرق وايي، چې اردوگان غواړي په ترکیه کې سیکولرزم او اتاترک ریښې لمنځه یوسي، چې په راتلونکي کې به هیڅوک د اردوگان مخالفت ونشي کړای.
د دې اسرائيلي لیکوال له نظره اردوگان یو کامیابه څېره ده او د کامیابۍ تر ټولو ستره لاسته راوړنه یې د ترکیې اقتصادي پرمختگ دی چې له لارې یې وکولای شول چې د ترکانو زړونو ته لار پیدا کړي.
