کابل ټکی کام ۱۳۹۵ زمری ۷ زرغون خوږیاڼی
دننګرهار ولایت په بهسودو ولسوالۍ کې د کلیو پراختیا وزارت د یو نیم میلیون امریکایي ډالرو په مالي لګښت ۱۵ کیلو متره کانال تر جوړيدو وروسته نن د زمري په ۷مه د یو لړ مراسمو په ترڅ کې ګټې اخیستنې ته وسپارل شو.
دغه کانال پنځلس کيلومتره اوږدوالی او اته فرعي ويالې لري.
د ننګرهار والي، چې په پرانسته کې يې ګدون درلود وویل، چې دغه کانال شاوخوا يو نيم میلیون امریکایي ډالرو په لګښت د کليو پراختيا وزرات د کارډيف پروګرام له لوري د درې کلونو په موده کې جوړ شو.
نوموړي زیاته کړه، د دغه کانال څخه په اتلس کلیو کې شاوخوا ۵۱۰۰ کورنۍ ګټه اخلي،چې پر یو مهال به یو زرو پنځوس هکتاره ځمکه خړوبه کړي او له امله به یې د یادې سیمې په حاصلاتو کې دیرش سلنه لوړوالی راشي .
ځايي اوسېدونکو د کلیو پراختیا وزارت څخه مننه وکړه، چې په دغه ولایت کې د کار موندنې ترڅنګ ګڼ شمېر نورې پروژې پیل کړي او همدا راز یې ترې غوښتنه وکړه، چې په دغه ولایت کې په بېلابېلو برخو کې نورې پروژې هم پیل کړي.
همدارنګه د کليو او پراختيا وزير نصیر احمد دراني وويل، چې ډېر ژر به په مومندرې او دوو نورو ولسواليو کې درې کليوالي سړکونه جوړ کړي.
نوموړي وويل، سږکال په ننګرهار کې د نهه ديرش نيم ميليونو ډالرو په ارزښت پر يو شمېر پروژو کار روان دی، چې يو شمېر يې بشپړې او په پاتې نورو يې تر کار لاندې دي .
ده وويل، چې د بهسودو د تنګي توغچي سربند څخه پنځه زره پنځه سوه جريبه ځمکه خړوبيږي او دغه کانال به په یو ساعت کې د شپږ متره مکعب اوبو ظرفيت ولري.
د کلیو پراختیا وزیر د معلوماتو له مخې د دغه کانال په جوړېدو سره به د بهسودو ځمکه په کال کې درې فصله حاصلات ورکړي.
