په کابل ښار کې د ولسي جرګې یو پخوانی غړی وژل شوی
(کابل ټکی کام ۱۳۹۵ زمری ۱۰) زرغون خوږیاڼی
تېر ماښام د کابل ښار په اتمه حوزه کې د ولسي جرګې یو پخوانی غړی داکتر اسدالله همت یار د نا معلومو وسله والو لخوا وژل شوی.
د کابل د اتمې امنیتي حوزې امر محمد داوود پکتیا وال ویلي، چې د ولسې جرګې دغه پخوانی غړی په کابل کې ستانکزي مېنې ته نږدې په خپل کور کې د تومانچې پر ډزو وژل شوی دی.
محمد داوود ویلي، چې تر اوسه د نوموړي د وژل کېدو علت نه دی معلوم او د وسله والو کسانو د نیولو په اړه پلټنې روانې دي.
اسدالله همت یار د تیرې دورې په ولسي جرګه کې د لوګر ولایت د خلکو استازی و.
د یادونې وړ ده، چې په کابل ښار کې د حکومت د لوړ پوړو چارواکو په نښه کول د خلکو اندنيښنې راپارولي دي، چې څنګه د نورو ولایاتو خلک په کابل کې د وسله والو لخوا په نښه کیږي او وژل کیږي.
