(کابل ټکی کام ۱۳۹۵ زمری ۱۱) زرغون خوږیاڼي
د افغانستان د بهرنیو چارو وزارت نن د دوشنبې په ورځ د پاکستان له لوري په تورخم کې د دروزاې جوړول په کلکه وغندل او دا کار یې مایوسه کوونکی بللی دی.
د وزارت په اعلامیې کې ویل شوي، چې پاکستان دغه کار د د دواړو هېوادونو ترمنځ د شوې موافقې او د ښه ګاونډیتوب د اصولو خلاف کړی دی.
افغان حکومت وايي چې د پاکستان د پرلپسې تیریو په اړه به جدي غور وکړي.
د یادونې وړ ده، چې د افغانستان د بهرنیو چارو وزارت په اعلامیه کې ویل شوي نه دي، چې له پاکستان سره دوی په کوم ډول موافقه کړې او په موافقه کې کومې مادې شاملې دي؟.
دوه میاشتې وړاندې، چې پاکستاني ځواکونو پر تورخم د دروازې جوړولو کار پیل کړ، د افغان سرحدي ځواکونو لخوا یې مخه ونیول شوه، چې په نتیجه کې جګړه ونښته او څو ورځې یې دوام وکړ، چې د دواړو لوریو څخه یو شمیر سرتیري ووژل شول.
وروسته د افغان حکومت لخوا سرحدي ځواکونو ته امر وشو، چې باید اقدام ونکړئ!
افغان ځواکونو د چارواکو دا کار یوه پټه معامله وبلله او ویې ویل، چې حکومت زمونږ په وینو سودا وکړه.
