دفاع وزارت: په تیرو څلورویشتو ساعتونو کې ۲۱ عسکر وژل شوي
( کابل ټکی کام ۱۳۹۵ زمری ۱۱) زرغون خوږیاڼي
دفاع وزارت په یوه خپره شوې اعلامیه کې ویلي، چې په تېرو څلورویشتو ساعتونو کې د هېواد په بیلابیلو برخو کې عملیات کړي او ۶۸ وسله وال طالبان یې وژلي دي.
دفاع وزارت وايي، چې یاد عملیات يې په ننګرهار ، غزنی، پکتیا، پکتیکا، خوست کندهار ، ارزګان، زابل ، فراه جوزجان ، کندز ، بدخشان او هلمند ولایتونو په ځینو ولسوالیو کې تر سره کړي، چې ۶۸تنه وسله وال وژل شوي، ۳۱ تنه ټپیان او ۷ تنه نور نیول شوي دي.
دفاع وزارت منلې، چې په یادو عملیاتو کې د ملي اردو ۲۱ تنه سرتیری هم وژل شوي دي.
دا په داسې حال کې ده، چې د هلمند په نادعلي ولسوالۍ کې د ټولنیزي شورا مشر محمد نبي الفت رسنیو ته ویلي، چې د ملي اردو او پولیسو د ۶۰ څخه تر ۷۰ پوري سرتیري لادرکه شوي دي.
نوموړي ویلي وه چې د تیري شپې په جګړه کې ۱۵ سرتیري وژل شوي او ۲۰ کسه نور ټپيان دي.
طالبانو ویلي، چې د هلمند په نادعلي ولسوالۍ کې تر محاصرې لاندې ۴۶ عسکر دوی ته تسلیم شوي دي او لړ زیات مهمات یې هم له ځانه سره راوړي دي.
