د الجزیرة نه په مننې
اسدخیل خوږیاڼی
په سوریه کې د وسله والو مخالفو ګوندونو ځواکونو د حلب ښار په داخل کې یو لوی تونل ته چاودنه ورکړې او د اسد د رژیم د طرفدارو ملیشو پراخ برید یې د دغه ښار په مختلفو خواوو کې له سختې ماتې سره مخ کړی دی، په داسی حال کې چې د رژیم ځواکونو د حلب د نیولو لپاره په یوه لوی برید لاس پوری کړی و.
د الجزیرة خبریال محمد عیسی د مخالفو وسله والو ګوندونود خبری سرچینو څخه په نقل قول سره وایي چې نن سهار د رژیم یو شمیر سرتیری د تونل له انفجار نه وروسته چې د دوې په لاس کې و د تونل لاندې شول او ووژل شول دا تونل د الاذاعه په سیمه کې چې د حلب ښار په مینځ کې موقعیت لري د مرتفعه سیمې ته څیرمه پروت دی چی لږ شمیر ځایونه د مخالفو وسله والو او زیاته سیمه د رژیم د ځواکونو تر کنترول لاندی ده.
خبریال زیاتوي چې له انفجار نه وروسته د الحی په سیمه کې چی زیاته اندازه سیمه یې د رژیم تر کنترول لاندی ده یو ځل بیا نښتی پیل شوي، سیمه ایز فعالان خبر ورکوي چی په دغه جګړه کې په لسګونو سرتیري وژل شوي او یو شمیر نور ټپیان شوي چې پکې ایرانیان او هم د لبنان د حزب الله سرتیری شامل دی.
بل خوا د سوریې رژیم طرفدار ځواکونه وایي چې د دوی ځواکونو نږدې دوه زره سرتیري چې پکی د عراق د نجباو تحریک، او د ایرانیان او حزب الله لوړ پوړي ځواکونه چې د قوات الرضوان په نوم شهرت لري د حلب ښار د نیولو لپاره روان کړي دي، د الوطن السوریة ورځپاڼې لیکلي دي چې د سوریې فوځ او طرفداران یې د یوه ستر بل برید لپاره تیاری نیسي چې غواړي بیرته هغه ځایونه ونیسی چې مخالفینو ورڅخه ویستلی دي چې هغه دحلب ښار په جنوب او جنوب لویدیځ کې پرتې سیمې دي.
راپورونه وایي چې جیش الفتح د نورو مخالفو وسله والو ځواکونو په ګډون د حلب ښار له غرب او د ادلب ولایت او د سوریی له شمال لویدیځ نه په سلګونو تازه دم سرتیری روان کړي څو په حلب ښار یو ستر برید تر سره کړی چی هدف یی د ټول حلب ښار بیرته نیول دي.
د الفتح ډلې چې له نورو مخالفو ډلو سره یې د حلب ښار د محاصري د ماتولو په جګړه کې ګډون درلود تیره شپه اعلامیه خپره کړې او د جګړې د یوې نوې مرحلې د پیل کولو په اړه یې ویلي دي چې ډیر زر به د حلب ټول ښار بیرته نیسی او د رژیم محاصره به له سختې ماتې سره مخ کړي.
اعلامیه زیاتوي چې برید به تر هغې پای ته ونه رسیږي تر څو پورې چې د حلب ښار په مینځ کې پرته تاریخی قلعه ونه نیسي چې دا په حلب ښار باندی د رژیم د حاکمیت نښه ګڼل کیږي.
همدا ډول اعلامیې سیمه ایزو خلکو ته اختیار ورکړی چې د جګړې پر مهال په خپلو کورونو کې پاته کیږي او که ووځي، او د سوریی فوځ ته یې بلنه ورکړې ده چې د اسد د ظالمانه رژیم له لیکو نه را جلا شي، د الجزیرة خبریال وایي چې د دې اعلامیی له خپرولو نه لږوروسته د الفتح فوځ د خپل پرمختګ لپاره مقدماتی برید پیل کړی او د حلب په لویدیځ کې یې د الراموسة سیمه چې الحمدانیة له سیمې سره نښلوي پرمختګ کړی دی.
مخالفو وسله والو د اونۍ نه په لږ وخت کې نږدې څلویښت متره مربع سیمه د حلب جنوب او جنوب لویدیځ خواته نیولې ده چې پکې د توپچي پوهنځی او د الراموسه ښارګوټی هم پراته دي، همدا راز یې د حلب جنوب ته د الراموسة په ټولو فرعی لارو خپله ولکه ټینګه کړې ده، دا سیمه د حلب د ختیځ سیمو د محاصری ماتول آسانه کوي، خو لاره لا هم له خطر سره مخ ده.
دغو ټولو وسله والو ډلو اعلان وکړ چې د هغه ستر برید مخه یې نیولې ده چې د الشیخ سعید په سیمه کې د سمنټو د فابریکې له اړخه چې د جنوبې حلب په اطرافو کې موقعیت لري پیل شوې وه، همدا راز یې یو بل برید چې د الراموسة په ښار کی پیل شوی و له ماتی سره مخ کړی دی، اعلامیه ټینګار کوي چی د ښار په شمال او د مزار الملاح او حندرات کمپ سیمه کې یې د رژیم او د هغه د طرفدارو ځواکونه بریدونه له شکست سره مخ کړي دي او زیاتوي چې په دې بریدونو کې یې یو زیات شمیر سرتیري هم وژلي دي.
د الجزیرة خبریال وایي چې روسي او سوریایي الوتکو نن په مسلسل ډول د حلب په ټولو هغو ځایونو باندې چې د رژیم د مخالفینو په لاس کې دي هوایي بریدونه ترسره کړل چې په نتیجه کې یې ښاریانو ته د پام وړ زیانونه اړولي دي، فعالان وایي د خان العسل ښارګوتي چې د حلب په غرب کې موقعیت لري پر هغو توغنديو ویشتل شوی دی چې د الکلور ګاز درلودونکي دي او خلکو ته یې ساه بندي راولاړه کړې ده.
