ترکیه: بیلا بیلو بریدونو کې ۱۰ تنه عسکر وژل شوي دي
(کابل ټکی کام ۱۳۹۵ زمری ۲۰) زرغون خوږیاڼی
د ترکیې د شرناک ولایت د بیت الشباب په ولسوالۍ کې د عراق سره په پوله نږدې د سرک پر غاړه د ځای په ځای شوي ماین په چاودنه کې ۳ تنه عسکر ووژل شول او ۱۰ تنه نور ټپیان شول، چاودنه هغه مهال رامنځته شوې چې ترکي عسکر پر ګزمه بوخت وو.
په خبر کې ویل شوي، چې د شرناک ولایت د اولو درې په ولسوالۍ کې هم د امنیتي ځواکونو د کتار د تیریدو پر مهال پرې ماین چاودنه وشوه، چې له امله يي ۵ تنه عسکر ووژل شول او ۸ تنه نور ټپیان شول.
همدارنګه د دیارباقر ولایت د لیجه په ولسوالۍ کې هم په ترکي سرتیرو برید شوی ، چې له امله یې ۲ عسکر وژل شوي او ۲ تنه نور ټپيان شوي دي.
ترکي چارواکو ویلي، چې له چاودنو وروسته په سیمه کې یو لړ چاڼیز عملیات هم شروع شوي دي.
ترکي چارواکي د یادو بریدونه پړه پر کردي یاغیانو اچوي او وايي، چې په دې ډلې یې په تونجعلي ولایت کې بمباري هم کړې ده.
د یادونې وړ ده ، چې په ترکیه کې له ناکامې کودتا وروسته کردي بیلتون غوښتونکو یا د پي کا کا وسله والې ډلې په ترکیه کې بریدونو ته زور ورکړی او اوسمهال یې ترکیه له سختو ننګونو سره مخ کړې ده.
