سرلیکنه
د هلمند له ولایت څخه یوځل بیا د سختوجګړو راپورونه ورکړل شول.
ویل کیږي، چې د دولتي ځواکونو او طالبانو ترمنځ جګړه د لښکرګاه دروازې ته رسیدلې ده.
وسله وال طالبانو د لښکرګاه دوه کیلومترۍ کې پردولتي پوستوبریدونه پیل کړي دي، چې د هلمند امنیتي مسئولینو لښکرګاه ته څېرمه د یو شمیر پولیس ماموریتونو او پوستو د لاسه ورکولو اعتراف هم کړی دی.
د لښکرګاه ښار ځکه د سقوط سره مخ کیدونکی دی، چې د تېرو دوو ورځو راپدیخوا پرې طالبانو سخته جګړه پیل کړې او بله دا چې د ولایتي چارواکو په وینا ښار ته ورغلو ټولو لارو کې ماینونه ښخ کړل شوي دي، چې د لارو پاکوالی او په ولسوالۍ کې محاصره شوو ځواکونو ته د لارو د پاکولو وروسته نورې قواوې رسیدل وخت غواړي.
د هلمند د چارواکوسره دا اندیښنه ده که دولت د لښکرګاه پر ښار جګړې ته توجه ونه کړي؛ نو د کندز د ښار په څیر د یوې بلې سترې ماتې سره مخ کیدونکي یو.
د لښکرګاه ښار سره په یو مهال د ناوې پر ولسوالۍ هم جګړه پیل شوې ده، چې د ناوې ولسوالۍ امنیتي پولیس هم د لښکارګاه په برخلیک اخته دي، که تازه دمې قواوې ورونه لیږل شي د ناوې ولسوالۍ هم د طالبانو لاس ته ورتلونکې ده .
د ناوې ولسوالۍ او د لښکرګاه پر ښار د طالبانو پرلپسې بریدونه اوسقوط لاملونه به نورهم وي؛ خو د دولتی ځواکونو ترمنځ نه همغږي ېې هم یو لامل کیدای شي او بله دا چې که دولت په هلمند کې په جنګي تګلاره کامل غور ونه کړي، جګړې ته لیږل شوي پولیس له تیښتې را ونه ګرځوي، یواځې یادې ولسوالۍ نه بلکې ولایت هم د طابانو لاس ته د ورتلو په حال کې دی.
د هلمند ولایتي چارواکي په یادو ولسوالیو کې د ستونزو د منلو ترڅنګ وايي، چې د نادعلي، مارجې، او ګرمسیر په ولسوالیو کې یې هم د جګړې د کابو کولو لپاره په یوه پلان غورکوي.
په هلمند کې د څو ولسوالیو نیول به خپله د ولایت نیولو ته لاره برابره کړي، چې که د هلمند ولایت د طالبانو لاس ته ورغی، د فاریاب ولایت خو سر له اوسه د سقوط په حال کې دی.
د ناوی په ولسوالۍ کې لومړی د تریخ ناورد سیمې پر ګډ امنیتي کمربند جګړه پیل شوه، چې دادی اوس له مرکز پرته نورې ټولې سیمې د طالبانو په واک کې دي. د پیرګړونج او لیوني په نوم پوستو په څیر به ولسوالۍ هم بې له مقاومته سقوط وکړي.
د فراه ولایت د ولایتي شورا رئیس خو وار د مخه ویلي دي، چې که حکومت پوره پاملرنه ونه کړي کیدای شي د کندز په څېر طالبان د فراه ولایت هم ونیسي.
اوس دا حقیقت هر څوک مني، چې وینه په وینه نه پاکیږي.
که د ولایت یا ولایتونو په نیولو جنګ پای ته رسیدلای، نو ټولو افغانانو به ېې د نیولو دعاوې کولی، د ولس په دعاو او مرستو به له کندوزه نیولې ۳۴واړه ولایتونه نیول شوي وای؛ خو لکه څرنګه چې د کندز د نیولو وروسته عام وژنه وشوه، دا رنګه د نورو ولایتونو د نیولو وروسته د بهرنیو هوایي ځواکونو لخوا د ړندوبمباریو او ملکي وګړو د وژنو زیات امکان شته دی.
که د ولسوالیو په نیولو سره په هیواد کې جنګ پای ته رسول کیدای شوای، اوس به د هیواد په ۷۰سلنه برخه کې امن وای، دواړه خواوې پر ځای ددې چې د جګړې لار ونیسي په خپلو منځو کې باید یوه داسې لاره غوره کړي، چې د ولایتونو د سقوط پرځای جنګ ته سقوط ورکړو.
هغه افغانان چې نن ورځ په خپلو منځو کې سره په جګړه بوخت دي، یوبل ته ګوته پرماشه دي، باید په کې دا ډول فضارامنځ ته کړو، چې یوبل سره د جګړې پرځای د مینې او سولې غاړې ورکړي.
