سرپل: محلي پولیسو د مسافرو پرمخ د بلخاب لاره تړلې ده
(کابل ټکی کام ۱۳۹۵ زمری ۲۴) زرغون خوږیاڼی
د سرپل ولایت د بلخاب ولسوالۍ اوسیدونکي وايي چې، محلي پولیسو د سانچارک ولسوالۍ په شین مسجد او لویو ابو سیمه کې د مسافرو پر مخ لویه لاره تړلې ده.
د مسافرو په وینا، په ده مرده سیمه کې هیڅ ډول امنیتي ستونزه نشته؛ خو محلي پولیس مسافر ځوروي او په ((لغتو او سوکانو)) یې وهي.
د مسافرو څخه دوه کسانو یې ازادۍ رادیو ته وویل: محلي پولیس همیشه د موټرو د تګ راتګ مخنیوی کوي.
هغوی وویل: مونږ نه پوهیږو دوی ولې دې کار ته ادامه ورکوي او هر ورځ د موټرو پر مخ لارې بندوي.
که مونږ وغواړو یادې سیمې ته په بله لاره لاړ شو، نو لومړی باید مزارشریف ښار ته ۱۵۰ کیلو متره اضافي او اوږده لاره ووهو.
د سرپل والي والي بیا وايي، چې د ده مرده سیمه اوسمهال د طالبانو په لاس کې او کله کله په کې امنیتي مشکلات زیات وي.
بلخوا د سرپل امنیتي چارواکي پيښه تائيدو او وايي،چې د بلخاب ولسوالۍ د سپین مسجد او لویو اوبو سیمه کې د محلي پولیسو تازه پوستې جوړې شوي او محلیان یې کومه نظامي زده کړه نه لري، نو ځکه د ولسي خلکو او مسافرو په ځورونه لاس پوري کوي.
