طالبان: د هلمند،کندهار لويه لار مو د دولتي ځواکونو پر مخ تړلې
(کابل ټکی کام ۱۳۹۵زمری ۲۶) الماس خدرخېل
طالبانو په خپل رسمي ويب پاڼه کې ويلي، چې د هلمند ولايت مرکز لشکرګاه او کندهار لويه لار يې د نهرسراج يکلنګ او شيندک سيمو کې د افغان امنيتي ځواکونو پر مخ تړلې، په خبرپاڼه کې راغلي، چې تېره ورځ ناوخته يې د عسکرو او پوليسو بريد په شا تمبولی. دوی دعوه کوي چې د دولتي ځواکونو درې عراده موټر يې په ماينونو تخريب کړي او سيمه اوس هم د دوی په واک کې ده.
په هلمند کې د افغان ځانګړو ځواکونو قومندان د رویټرز خبري اژانس ته ويلي و، چې په دغه ولایت کې د طالبانو «ځانګړي ځواکونه» په وسلو مجهز او سنبال دي، چې جګړه مخ پر وړاندې وړي.
د افغان ځانګړو ځواکونو قومندان سیدمراد له قوله، چې طالبان په درنو وسلو، منظم لباس، د شپې لېدلو په ټيکنالوژۍ او په پرمختللیو وسلو سنبال دي. سیدمراد زیاته کړې، چې د طالبانو ځانګړي ځواکونه د «سرې قطعې» په نوم یادیږي چې د شپې دوربینونو په شمول، ۸۲ ملي متري توپونه راکټونه، پیکاوې، امریکايي توپکونه، درنې او پرمختللې وسلې لري.
