د شپږیزې سیالیو پایلوبې(فاینل) ته کابل بازان ووتل
(کابل ټکی کام ۱۳۹۵ زمری ۲۷) زرغون خوږیاڼی
د کرکټ د شل اووريزو شپـږيزې سیالیو د دويم پړاو په لومړۍ لوبه کې د کابل بازانو لوبډلې امونهنګانو ته په ماتې ورکولو سره د دې سياليو پایلوبې(فاینل) ته لاره پيدا کړه.
نن د دويم پړاو لومړۍ لوبه د کابل بازانو او امو نهنګانو تر منځ ترسره شوه،د لوبې پچه د کابل بازانو لوبډلې وګټله او لومړى يې د توپوهنې پرېکړه وکړه.
کابل بازانو په ټاکل شوو ٢٠ اورونو کې د ۷ لوبغاړو په سوځېدو سره ١٨٤ منډې جوړې کړې.
د دوى له لوري شهزاد محمدي د شپږو شپږيزو پر مټ ٧٨ او لوبډلمشر اصغر ستانکزي ٤٩ د پام وړ منډې وکړې.
په مقابل کې د امو نهنګانو لوبـډلې ياد هدف ترلاسه نه شو کړاى او په ٢٠ اورونو کې د ۸ لوبغاړو په سوځېدلو ١٦٨ منډې جوړې کړې او دغه راز يې دا لوبه د ١٧ منډو په توپير سره کابل بازانو ته بايلوده.
د کابل له لوري راشد خان ٤ او محمد سميع ٢ لوبغاړي وسوځول.
په دغې بریا سره کابل بازانو لوبډلې وکولای شول، چې د شپږیزو سیالیو فاینل ته نیغ په نیغه لاره پیدا کړي، بلخوا د امو نهنګانو لوبډله اوس یو بل چانس هم لري.
نن له غرمې وروسته د دويم پړاو دويمه لوبه د مس عينک اتلانو او بند امير تر منځ کېږي، ګټونکې لوبډله به له امو سره لوبه کوي او د دې لوبې ګټونکې لوبـډله به پاى لوبې ته لاره پيدا کوي.
