(کابل ټکی کام ۱۳۹۵زمری ۲۹) الماس خدرخېل
طالبانو په يوه خبرپاڼه کې ويلي، چې دوی د ننګرهار ولايت حصارک ولسوالۍ، امنيه قومندانۍ او يو شمېر نورو پوستو باندې وسلوال بريد کړی، دوی واي چې د بريد په پايله کې يې له افغان ځواکونو ۱ لوی بيس او ۶ پوستې نيولي او د ۲۸ تنو عسکرو او محلي پوليسو د وژلو دعوه کوي.
خبر زياتوي، چې په دې جګړه کې يې ۲ دوه تنه عسکر ژوندي نيولي او د دولتي ځواکونو ټانګونه يې تخريب کړی.
دوی همدارنګه د يو شمېر اسلحو د نيولو ادعا کوي او وايي، چې په دې بريد کې يې ډول ډول نظامي توکي له افغان ځواکونو نيولي.
طالبانو د خپلو دوه تنه ملګرو د وژل کېدو تر څنګ ويلي، چې ولسوالۍ د دوی تر کلکې محاصرې او بريدونو لاندې ده.
تر دې دمه د حصارک ولسوالۍ د بريدونو په اړه د ننګرهار چارواکي چوپه خوله دي.
