اردوغان: د سوريې جرابلس ښار مو له داعش ډلې نيولی
(کابل ټکی کا ۱۳۹۵وږی ۴) الماس خدرخېل
د ترکيې رئيس جمهور ويلي، چې د سوريې د جرابلس ښار يې له اسلامي دولت وسلوالو نيولی.
رجب طيب اردوغان په انقره کې د امريکا د جمهوررئيس معاون جوبايډن سره په ملاقات کې وويل، چې د جرابلس ښار له هغې وروسته سقوط وکړو، چې د دوی ځانګړي ځواکونه او ټانګونه د امريکايي هوايي جنګي طيارو په ملتيا د ترکيې له سرحد نه ور واوښتل.
جوبايډن وويل، چې امريکا د دې عملياتو حمايت کوي او په دې عملياتو کې به د امريکا جنګي الوتکې د ترکيې د ځانګړو ځواکونو کمک کوي.
د ترکيې پوځ ويلي، چې په دې عملياتو کې يې يو تن پوځي سرتېری وژل شوی او په لسګونه داعشيانو ته يې مرګ ژوبله وراړولې.
د جبهة النصرة رسنيو ويلي، چې داعش جنګيالي د جرابلس نه سويل لوري ته د الباب ښار ته تښتېدلي دي.
په يادو عملياتو کې د ترکيې پوځ د (بيرقدارټي بي۲) بې پيلوټه الوتکو نه د داعش د مرکزونو د څار په موخه کار اخيستی.
د يادونې ده، چې ملګرو ملتونو په سوريه کې د فراټ ډال په نامه عملياتو نه ملاتړ اعلان کړی او په ترکيه کې وروستۍ چاودنې او بريدونه يې غندلي.
