په بلجيم کې چاودنې مرګ ژوبله اړولې
(کابل ټکی کام ۱۳۹۵وږی ۵) الماس خدرخېل
تېره شپه ناوخته د بلجيم هېواد د سپورت په يو تالار کې چاودنه شوې، چې له امله يې د تالار يوه برخه نړېدلې.
د بلجيم رسنيو ويلي، چې ياده چاودنه د نوموړي هېواد په چيمای ښار کې په يوه تالار کې رامنځته شوې.
په خبر کې ويل شوي، چې په پېښه کې تر دې دمه د يو تن مړی موندل شوی او دوه تنه نور ټپيان دي.
ځايي خلکو د بلجيم رسنيو ته ويلي، چې د چاودنې له امله د سپورت تالار يوه برخه نړېدلې او ګمان کېږي چې ځينې کسان ورلاندې وي.
د پېښې ځای ته پوليس او د ژغورنې ډله وررسېدلې او د ژغورلو چارې يې پيل کړي.
تردې دمه د پېښې پړه چا پر غاړه نه ده اخيستې او لا هم د چاودنې لامل څرګند شوی نه دی.
د يادونې ده، چې په وروستيو کې په اروپايي هيوادونو کې دغه ډول پېښې زياتې شوي.
