امریکایي الوتکو په افغان سرتیرو بمبار کړی.

کابل ټکی کام (۵ وږی،۱۳۹۵ل ) بصیراحمد پاڅون

نن سهار په تازه رپوڼو کې راغلي چې امریکایي الوتکو د طالبانو پرهغه زندان برید کړی چې بندیان سرتیري پکې ساتل کیدل.
د طالبانو ویاند قاري یوسف احمدي وایي: تیر مازدیګر شاوخوا ۶ بجې د هلمند ولایت نادعلي ولسوالۍ په ژړ پول سیمه کې امریکايي الوتکو د مجاهدینو پر یو زندان بمبار وکړ چې له امله يې ۲۲ تنه زنداني عسکر او پولیس په کې مړه او ۳ تنه ټپيان شول.
دا هغه د زندان وو چې د مجاهدینو لخوا د هلمند په دا وروستیو جګړو کې د کابل ادارې اړوند ژوندي نیول شوي عسکر او پولیس په کې ساتل کیدل .
همدا راز په بمبار کې ۳ تنه محافظ مجاهدین هم شهیدان شوي چې د زندان د ساتلو دنده ور له غاړې وه.
دغه وحشت په داسې حال کې ترسره کیږی چې نن ورځ جمعه د یادو عسکرو او پولیسو خپلوان سیمې ته راغوښتل شوي وو، ترڅو ضمانتونه ورڅخه واخيستل شي او اسیر شوي خپلوان يې د ډاډ په ترلاسه کولو سره ور خوشي شي.
کله چې امریکایان په همدې پلان خبر شوي (چې مجاهدین دغه بندیان له خلکو سره د ښه سلوک له امله ، په دې ضمانت سره چې بیا به د کابل ادارې لیکوته نه ورځي؛ خوشي کوي)، نو يې یاده پروسه سپوتاژ کړه او په زندان باندې يي بمبار وکړ.
داسې خبرونه راغلي چې د وژل شوو خپلوان اوس سیمې ته رسیدلي دي، ځکه نن يې د خپلوانو عسکرو او پولیسو د خلاصیدو مرحله تطبیق کیده ، چې ټول د خپلو خپلوانو په جنازو واوښتل.
طالبانو د رسنیو په خبریالانو غږ کړی دی چې د یادې پيښې د پلټنې او واقعیت ښه څرګندولو لپاره رسنۍ کولای شي سیمې ته سفر وکړي، له یاد ځای څخه لیدنه وکړي او د دغو وژل شوو کسانو جسدونه وګوري، خپلوانو سره يې خبرې وکړي او یاد زندان له نیږې وویني.
مجاهدین سیمې ته د تلونکو ژرونالستانو لپاره د ورتګ زمینه سازي کوي او د هر راز مشکلاتو څخه د مصئونیت ډاډ ورکوي.
د امریکایي چارواکو دا کړنه به د دوی پر خلاف د دولت پلوه افغانانو کرکه راوپاروي خو وبه لیدل شي چې د ملي وحدت حکومت مشران به څه غبرګون ښکاره کړي؟
خو له دې وړاندې یې د امریکایي الوتکو په بمباریو کې د وژل شویو عسکرو، پولیسو، اربکیانو او عامو خلکو په وژنه هیڅ غبرګون نه دی ښکاره کړی.