ترکيه: د پوليسو په مرکز موټربم بريد ۸ پوليس وژلي
(کابل ټکی کام ۱۳۹۵وږی ۵) الماس خدرخېل
د ترکيې پوليسو ويلي، چې شرناک ولايت د جيزرې ولسوالۍ د امنيې قومندانۍ تر څنګ د پوليسو د تالاشۍ په نقطۍ د موټربم بريد شوی.
د ترکيې خبري اژانس ويلي، چې موټربم چاودنه د چټک غبرګون د پولیسو له مرکزه ۵۰ متره لیرې د شرناق او سیزر ترمنځ شوې ده.
ځايي پوليسو ويلي، چې د دې زورورې چاودنې له امله د چټک غبرګون پوليسو د امريت ودانۍ زيانمنه شوې.
د لومړنيو ريپوټونو له مخې په پېښه کې د ۸ پوليسو د وژل کېدو په ګډون يو زيات شمېر ټپيان شوي هم دي.
د پيښې ټپيان په سمدستي ډول نږدې روغتونونو ته د تداوۍ په موخه وړل شوي.
امنيتي ځواکونو د جيزرې ولسوالۍ ته راتلونکې او تلونکې ټولې لارې په پېښه کې د ککړو کسانو د نيولو په موخه تړلي او پوليسو د پلټنې عمليات پیل کړي.
د پېښې پړه ترکیې دولتي چارواکو پر داعش ډلې وراچولې او وايي، چې دا ځانمرګی برید دی چې احتمال لري د ”اسلامي دولت” (داعش) ډلې کار وي.
د يادونې ده، چې په ۲۰۱۵ کال سیزر کې د کردي اورپکو او حکومتي ځواکونو ترمنځ جګړه کې د ښار ډېره برخه ویجاړه او ګڼ کسان ووژل شول.
سیزر کې تر ډېره کردان اوسېږي. دغه ښار د عراق او سوریې پولو ته څېرمه پروت دی.
په تېره مارچ میاشت کې سیزر کې د کردي اورپکو او حکومتي ځواکونو ترمنځ جګړه کې ګڼې ودانۍ ویجاړې شوې.
