خانجان الکوزی: د افغانستان تازه میوې به هند او عربي اماراتو ته استول کیږي
(کابل ټکی کام ۱۳۹۵ وږی ۹) زرغون خوږیاڼی
د افغانستان د سوداګرۍ د خونې مرستیال خانجان الکوزی وايي، چې د هېواد تازه مېوې به د هوا له لارې هند او عربي امارتو دوبۍ صادرې کړي، ده زیاته کړه چې هند د افغانستان دې پرېکړې ته هر کلی کړی او ژمنه یې کړې ده چې د صادراتي تازه میوو مالیه به نه اخلي.
هغه وویل، تراوسه څو ټنه تازه مېوې د انګورو په شمول د هوا له لارې نوي ډيلي ته لېږل شوې دي او نن به نورې الوتکې هم د ډیلي په لور پرواز وکړي.
الکوزي ویلي، چې ډیلي او دوبۍ ته ددغو مېوو لېږدولو ته د اریانا هوایي شرکت چمتووالی لري او له بلې خوا هند هم ژمنه کړې چې ددغو مېوو لېږدولو لپاره به هندي الوتکې د افغانستان په واک کې ورکړي.
ښاغلي الکوزي په اړه د افغانستا له ټولو سوداګرو وغوښتل، چې ددې هېواد د سوداګرۍ خونې څخه مشخصه کړي تر څو څومره تازه میوه د صادرولو لپاره لري.
دا پریکړه وروسته له هغه کیږي، چې له څو اوونیو راهیسې پاکستاني چارواکو د چمن ـ سپین بولدک لاره تړلې ده، چې تر اوسه د افغان سوداګرو مالونو ته اجازه نه ورکوي.
ویل کیږي، چې د چمن ـ سپین بولدک لاره باندې هره ورځ نږدې ۶۰ کانتینره تازه میوه د پاکستان هېواد ته استول کیده، چې د لارې په بندیدو سره افغان تجارانو ته په میلیونونو ډالره تاوان ورواوښت.
