د کلکاني د بيا خښولو په مراسمو کې نښته رامنځته شوې
(کابل ټکی کام ۱۳۹۵وږی ۱۱) الماس خدرخېل
حبیب الله کلکاني یا بچه سقاو ته د منسوبو هډوکو د بیا خښولو په مراسمو کې ګډوډي پېښه شوه او د ډزو په تبادله کې یو شمېر کسانو ته مرګ ژوبله اوښتې.
د شمال د پخوانۍ ټلوالې مشرانو نن د کابل په عیدګاه جومات کې د سقاو زوی او د هغه د ملګرو د پاتې شونو د جنازې له مراسمو وروسته هڅه وکړه، چې دا هډوکي په شهرارا غونډۍ کې خښ کړي خو د جنرال دوستم پلویانو مخکې تر مخکې د سقاو پلویانو ته خبرداری ورکړی و، چې په دې تاریخي ځای کې به د افغانستان د تاریخ دا بدنامه څېره خښولو ته پرېنږدي.
ټاکل شوې وه، چې نن به د حبیب الله کلکاني مړی د کابل ښار په شهر ارا تپه کې یو ځل بیا خاورو ته وسپارل شي. خو دغه غونډۍ د کلکاني د بیا خښونې څخه وړاندې د دوستم ملېشو نېولې وه او ویل یې چې هېچاته اجازه نه ورکوي چې په دغه سیمه کې خپل مړي خښ کړي.
د حبیب الله کلکاني پلویان وايي چې د دوستم وسلهوالو پرې ډزې کړي دي چې له کبله یې ۵ کسان ټپیان شوي دي.
د شمالي ټلوالې ځينو مشرانو، د عطاء محمدنور په ګډون د دې غونډې امنيت نيولی و.
